Владимир Невоструев Омскын бырем ожгарчиослэн ӵыжы-выжыосслы мур куректэмзэ вераз
14.07.2015
Туннэ Кун Кенешлэн Тӧроез Владимир Невоструев мур кайгыремзэ вераз Омскын бырем но сӧсырмыны шедем шаерысьтымы солдатъёслэн ӵыжы-выжыоссылы. Соослы котыр ласянь юрттэт сётэмын луоз шуыса оскытӥз Удмуртилэн Тӧроез но. Казарма куашказ бер ӝыт, соку солдатъёс изьыны выдэмын вал ни. Али дырлы тодмо: куашкам бетон борддор улэ пачказ 45 адями. Жаляса верано, 23-эз соос пӧлысь бырыны шедемын. Куинез – Удмуртиысь: Сьӧлта черкогуртысь Сергей Вахрушев, Ижысь Валерий Ломаев но Можгаысь Эдуард Решетников.
Асьме элькунысь бырыны но сӧсырмыны шедем пиослэн ӵыжы-выжыоссылы юрттэт сётонэн выре Удмуртиысь военной комиссар Александр Комлев.
Россиысь Следствие нуонъя комитет ивортэ, Светлой посёлокысь 4-этажъем юрт, кытын дышетско вал ВДВ-ын службазэс нуись пиос, куашказ урод ремонт лэсьтэм бере. Тупатъян ужъёсты нуиз Нижний Новгородысь компания. Со вылэ уголовной уж ӝутэмын.
Туспуктэм – «Российская газета»