Владимир Невоструев Ува ёросысь фанера поттон предприятие вуылӥз
11.09.2015
10-тӥ куарусёнэ 2015-тӥ арын Кун Кенешлэн Тӧроез Владимир Невоструев но Россиысь Кун Думалэн депутатэз Николай Мусалимов Ува ёросысь фанера поттонъя ООО «Орион» предприятие вуылӥзы. Отын выль линия ужаны кутскиз. Выльдӥськонзы 28 миллион манет тыр усиз. Со сярысь вераз «Орионлэн» кивалтӥсез Александр Штумф. Со озьы ик азьланезлы чакланъёс сярысь ивортӥз.
Заводлэн выль инвестиционной проектэз фанера, гнутоклееной изделиос но пиломатериал поттонлэсь лыдзэ будэтон понна кутскемын. Соин ӵош, выль уж интыос но кылдозы.
Владимир Невоструев инвестиционной проектлэсь кулэлыксэ но солэсь Ува ёрос понна пайдалыксэ умоен пусйиз.