Кун Кенешлэн Тӧроез Ижкар думае быръёнъёсын куаразэ сётӥз

Кун Кенешлэн Тӧроез арня нуналэ ӵукна Ижкар думае быръёнъёсын куаразэ сётӥз. Шоркарысь 93-тӥ школае интыяськем участокын, быръён комиссилы паспортсэ возьматыса, Владимир Невоструев кык бюллетень басьтӥз. Куара сётон кабинкаын, кудаз пыриз Кун Кенешлэн Тӧроез, авторучказы вылымтэ, но быръён комиссилэн ужасьёсыз сыӵе тырмытэез соку ик палэнтӥзы.
Куаразэ сётэм бере, элькун парламентлэн Тӧроез та школаысь ик мукет участокъёсы вуылӥз. Трос-а калык лыктэ шуыса тунсыкъяськиз.
Журналистъёсын вераськыкуз, Владимир Невоструев кандидатъёс асьсэзыс быръён кампани вакытын гинэ умоен возьматыны кулэ ӧвӧл шуыса пусйиз.
«Депутат луэмзы бере, соос вань ужатозязы саклыкзэс висъяны кулэ бырйисьёссылы, юрттыны соослы котькыӵе ужын», - вераз Кун Кенешлэн Тӧроез.
Быръён участокъёс туннэ, 13-тӥ куарусёнэ 2015-тӥ арын, усьтӥськизы 8 часын ӵукна. Ужалозы 20 часозь ӝытозь. Ижкарын, Сарапулын, Глазовын, Воткинскын, Можгаын улӥсьёс быръё кар думае депутатъёсты. Со сяна, туннэ 3 округъёсын Кун Кенеше ватсаса быръёнъёс ортчо.
Озьы ик, элькунамы депутатъёсты быръёнъёс Камбарское (Камбарка ёрос) но Октябрьское (Дэри ёрос) гурт поселениосын мыно.