Газет-журналъёслы гожтӥськон ужпумез эскеризы

15-тӥ куарусёнэ 2015-тӥ арын Владимир Невоструев кивалтэм улсын Кун Кенешлэн Президиумезлэн кенешоназ вераськизы газет-журналъёслы гожтӥськон сярысь. Кызьы ивортӥз элькунысь печатья но массовой коммуникациосъя агентстволэн кивалтӥсез Алексей Воронцов, 2014-тӥ арын федрал бюджетысь дотациосты быдтэмен, периодической изданиослы гожтӥськон тарифъёс кыкетӥ паларысен будӥзы 40-50 процентлы. Дунъёс йылэмен тиражъёс кулэсмизы. 2014-тӥ арлы элькун но ёрос газетъёслэн огъя тиражзы ичиёмиз тямыс сюрслэсь ятыр экземплярлы.
Алексей Воронцовлэн верамезъя таӵе югдур кылдэмлэн мукет мугъёсыз но вань - калыклэн табышез ичия, лыдӟиськиськисёс ӧжытгес кылё, адямиослы статьяослэн пуштроссы уг кельшы. Соин ик газет-журналэз басьтӥсьёс кулэсмо.
Кун Кенешысь йӧскалык политикая но кышкыттэмлыкъя, Регламентъя но Кун Кенешлэсь ужзэ радъянъя ӧрилэн кивалтӥсез Энвиль Касимов докладаз анай кылын изданиосты будэтонлэсь кулэлыксэ пусйиз. Со та уже пӧртэм выжыысь калыкъёслэсь мерлыко огазеяськонъёссэс кыскыны дэмлаз.
Газет-журналъёслы гожтӥськон ужпумез эскероно каръёслэн, ёросъёслэн, гурт поселениослэн кивалтэтъёсынызы, - пусйиз депутат.
Президиумлэн ёзчиосыз огкылэ вуизы – адямиослы матэгес луоно, изданиосты вӧлмытон борды дэмен басьтӥськоно. Кун Кенешлэн Тӧроез Владимир Невоструев верамъя, почта пыр гожтӥськон дуно усе ке, калык дорозь изданиосты вуттон мукет амалъёс утчано.
«Воштӥськонъёс луыны кулэ котьку но котькытын, печатной изданиос пӧлын но. Но со воштӥськонъёс умой пала мед берытскозы. Дугдытыны, ворсаны, уксё ӧвӧл шуыны котьку луэ. Газет-журналъёсты калык мед басьтоз но мед лыдӟоз шуыса ужано но ужано. Выль амалъёс утчано, пуштроссэ тунсыкогес карон понна сюлмаськоно», - шуиз Владимир Невоструев.