Кун Кенешлэн дас укмысэтӥ сессиез ортчиз

29-тӥ куарусёнэ 2015-тӥ арын Кун Кенешлэн дас укмысэтӥ сессиез ортчиз. Ужрад кутскемлэсь азьло, элькун парламентлэн Тӧроез Владимир Невоструев куинь выль быръем депутатъёслы Олег Караваевлы, Евгений Масленниковлы но Алексей Чулкинлы депутат удостоверениос сётӥз. Соос ваньзы «Единая Россия» партия ӵектэмен быръёнъёсы пыриськизы.
Туннэ ик Кун Кенеш асьсэлэн мылкыд каремзыя Олег Бекмеметьевлэсь но Дмитрий Кулишовлэсь дырызлэсь вазь депутат ужзэс дугдытон сярысь пуктэт кутӥз. Олег Бекмеметьев быръемын Глазов карлы тӧрое, нош Дмитрий Кулишов Ижкарлэн Кар Думаяз ужалоз.
Озьыен, Кун Кенешын 3 депутат мандатъёс бушамын. Тодады вайытом, 23-тӥ инвожое парламентариос ас мылкыд каремезъя Александр Ессенлэсь дырызлэсь вазь депутат ужзэ дугдытон сярысь пуктэт юнматӥзы. Нош куарусён толэзе со Сарапул карлы тӧрое быръемын.
Кун Кенешлэн дас укмысэтӥ сессииезлэн повесткаяз пыртэмын вал 22 юан, соос пӧлын 10 законопроектъёс. Нунал ӵоже парламентариос вань чаклам ужпумъёсты эскерыса вуттӥзы. Куинь мировой судьяосты юнматӥзы, кыкетӥ лыдӟонын тупатонъёс пыртэмын «Удмурт Элькунын дунтэк юридической юрттэт сётон сярысь» элькун законэ, кутэмын «Удмурт Элькунын бюджет кусыпъёсты радъян сярысь", но «Удмурт Элькунысь адямилэн правоосызъя оскем мурт сярысь» законъёс. Воштонъёс пыртэмын «Удмурт Элькунын муниципальной служба сярысь» катэ.
Кун Кенешлэн вуоноез кызетӥ сессиез 2015-тӥ арын 27-тӥ коньывуонэ ортчоз.