ЛДПР фракцилэн кивалтӥсез ас мылкыд каремезъя куштӥськиз депутат луонлэсь

Кун Кенешысь ЛДПР фракциен 2011-тӥ арысен кивалтэм Дмитрий Кулишов ас мылкыдызъя куштӥськиз депутат луонлэсь. Элькун парламентын тыршемезлы со йылпумъянъёс лэсьтӥз.
Дмитрий Кулишов бырйылэмын 2 ӧтчамъёсы. Туэ 13-тӥ сентябре ортчем быръёнъёс бере тодмо луиз: Иж городлэн Думаяз ЛДПР партилы висъяськоз 2 мандат. Озьы одӥгзэ ас вылаз басьтыны мылкыд кариз Дмитрий Кулишов.
Элькун парламентысь город Думае выжон учыръёс, зэмзэ вераса, ӵем уг пумиськыло. Кыдёке ветлонэз ӧвӧл: Владимир Бодров но Алексей Прасолов Кун Кенеше ик кыльыны мылкыд каризы, город Думаысь мандатъёссэс мукетъёсызлы сётӥзы. Нош маин герӟаськемын Дмитрий Кулишовлэн кошкон мылкыдыз?
— Кӧт уг веська, городысь кивалтӥсьёслэсь ужамзэс учкыса, — шуиз со. — Думаысь депутатъёс пӧлын ӵем шараясько кузьмаськон учыръёс, со сяна, трос юанъёс кылдо ЖКХ-лэсь ужзэ радъянъя но, муниципал ваньбурез кутонъя но. Тае ваньзэ рос-прос радъяны кулэ. Ӵапак та удысъёс борды ик басьтӥськеме потэ.
Журналистъёс тунсыкъяськизы: кин табере кивалтоз Кун Кенешысь ЛДПР фракциен? Дмитрий Кулишов та интые ӵектэ парламентысь мукетсэ либерал-демократэз — Тимур Ягафаровез. Нош Кун Кенешысь депутатлэсь мандатсэ оскыны чакла Геннадий Зарубежновлы — Дэри ёросысь Депутатъёслэн кенешсылэн ёзчиезлы, Кун Кенеше 2012-тӥ арын ортчем быръёнъёсы ЛДПР партилэн списокезъя пыриськем муртлы.