Семьяоссэс курадӟытыса улӥсь адямиослы штраф тупатозы

6-тӥ коньывуонэ 2015-тӥ арын Энвиль Касимов кивалтэм улсын Кун Кенешысь йӧскалык политикая, кышкыттэмлыкъя но Регламентъя ялан ужась ӧрилэн кенешонэз ортчиз. Отын «Нимаз правонарушениос понна административной кылкутон сярысь» элькун катэ пыртыны чаклам воштонъёсты эскеризы. Вераськон мынӥз семьяязы йыртэмасьёс понна кылкутытонэз чурытатон сярысь. Матысь адямиоссы вылэ кизэс ӝутканы яратӥсьёс понна штраф тупатыны дэмламын. Законлэн проектэзъя, семьяоссэс курадӟытыса улӥсь адямиослы административной кылкутытон -500 манетысен 1500 манетозь штраф чакламын.
Прокуратураын ужасьёслэн верамзыя, туннэ нуналэ Удмуртиын гинэ, законодательствое таӵе тупатонъёс пыртымтэ. Россиысь мукет улосъёсын тыриськонъёс тупатэмын ни.
«Асьмеос та юанэн кема кенешим, эскерим мар кароно, та ужпумез вырӟытон понна. Одӥгез тодмо – федерал законэ асьмеос тупатонъёс пыртыны кулэ. Озьы ке ӧм каре, азьлань ум мынэ. Кун Думаын Удмурт Элькунлэн нуналъёсыз ортчыку, асьмеос та ужпуез ӝутомы», - пусйиз Энвиль Касимов.
Выль кат ӵектосэз Кун Кенешлэн шуркынмонэ ортчоно сессияз эскерозы.