Кун Думаын но Федерация Кенешын Удмуртилэн нуналъёсыз ортчозы

19-тӥ-23-тӥ октябре Россиысь Кун Думаын но Федерация Кенешын ортчозы Удмурт Республикалэн нуналъёсыз. Кинъёс отчы вуылозы но кыӵе ужпумъёс сярысь вераськон мыноз?
Федерация Кенешын но Кун Думаын пумиськонъёслы дасяськыса, асьме Кун Кенешын али нуналлы быдэ ортчо совещаниос. Угось асьме сюлмаськонъёсмы, куронъёсмы сярысь федералъёслы ӝот-ӝот вераны быгатоно. Удмурт Республикалэн нуналъёсыз дыръя Федерация Кенешысь пӧртэм комитетъёслэн ужазы пыриськозы Удмуртиысь Кун Кенешлэн Тӧроез Владимир Невоструев, солэн воштӥсьёсыз но Кун Кенешысь комиссиослэн вань кивалтӥсьёссы. Кылсярысь, Кун Кенешлэн Тӧроезлэн воштӥсез Софья Широбокова пыриськоз бюджетъя но коньдон рынокъёсъя комитетлэн ужаз. Отын со дэмланэн потоз: 50 процентлэсь трос налогъёссэс федерал кисые келясь субъектъёслы дотациос мукет сяменгес мед висъяськозы. Софья Широбоковалэн верамезъя, сыӵе опыт вал ни 2010-тӥ-2012-тӥ аръёсы, соку сётӥсько вал нимысьтыз компенсациос, озьы доходъёслэсь федерал бюджетэ кошкемзэс республика капчиенгес чидалляз.
Шаермылэн кулэяськонъёсыз сярысь Россилэн парламентаз вераськозы министръёсмы но. Али соос рос-прос ужало докладъёссэс дасян бордын. Федерация Кенешлэн комитетъёсаз вераськозы: промышленностья но вуз каронъя министр Олег Радионов, транспортъя но сюрес хозяйствоя министр Виктор Вахромеев, лэсьтӥськонъя, архитектурая но улон инты политикая министр Иван Новиков, энергетикая, жилищно-коммунальной хозяйствоя но тарифъёсты кун ласянь радъянъя министрлэн нырысетӥ воштӥсез Сергей Сивцов, коньдон ужпумъёсъя министр Станислав Евдокимов, дышетонъя но наукая министр Алексей Мирошниченко, культурая но туризмъя министр Владимир Соловьёв, гурт удысъя но сиён-юонъя министр Александр Прохоров, тазалыкез утёнъя министр Алексей Чуршин.
Федералъёс азьын ӝутэмын луозы пӧртэм ужпумъёс. Кылсярысь, Удмуртиын сюресъёс лэсьтон, Ижысь аэропортын самолётъёслы ӝутскон интыосты дасян, нылпи садъёс пуктон, гуртъёсын нылпиосты дышетон, куашкан калэ вуэм юртъёсысь калыкез выль юртъёсы выжтон, трос квартираем коркаосын ремонт лэсьтон но мукет. Алексей Мирошниченко дэмлалоз Ижысь техникая кун университетлэн инъетэз вылын кампус но технопарк кылдытыны. Владимир Соловьёв сенаторъёс азьын вераськоз Удмуртилэсь историзэ утён сярысь, ожгар тӥрлык поттонъя заводлэсь валтӥсь корпуссэ тупатъянлы федерал субсидиос висъяны куроз. Угось та юрт архитектураысь синпелет лыдъяське. Вераськон мыноз Кам шурлэн ярдуръёсаз туристъёслы чаклам кластер кылдытонъя проект пумысен но. Чакламын тазалыкез утёнлы но саклык висъяны: федералъёслэсь юрттэт куроно луоз элькунысьтымы Ты висёнъёсын нюръяськонъя диспансерлэсь выль корпуссэ пуктыны — вужез куашкан калэ вуэмын ни.