Ижкарысь школаосысь сиськонниос эскеремын

«Единая Россия» партилэн Удмурт ёзэзлэн «Калык контроль» проектаз пыриськисьёс эскеризы Ижысь куд-ог школаосысь столовойёсты. Соослы нимысьтыз саклык висъяны курыса, ӵектонэн потӥз проектлэн координаторез, Кун Кенешлэн Тӧроез Владимир Невоструев.
Пӧран интыосты эскероно кариськизы Ижысь 72 номеро школаын нылпиос шугомем бере: соослы урод луэм сиськемзы бере. «Калык контроль» рейдэн потӥз шоркарысь 16, 86, 97 номеро школаосы. Эскерисьёс пӧлын таяз радэ вал Кун Кенешысь наукая но дышетонъя, культурая но егитъёсын ужан политикая, озьы ик гурт удысъя, музъем кусыпъёсъя но инкуазь узырлыкъёсъя ялан ужась комиссиослэн кивалтӥсьёссы Наталья Сударикова но Владимир Варламов, дышетонъя но наукая министерствоысь но Ижкар администрациысь дышетонъя управлениысь специалистъёс, калык огазеяськонъёсы пыриськисьёс.
16 номеро школаын столовойзы люкытгес, но ваньмыз лад-лад радъямын: ӝӧкъёс вылэ кышетъёс вӧлдэмын, сиён нуллӥсь дежурнойёслэн кусказы азькышет керттэмын, йырсизы ватэмын, сиён пӧран но тусьты-пуньы миськон интыосын чылк-чылк. Эскерисьёсты паймытӥз таиз но: котькуд ӝӧк вылэ пуктэмын юдэм чеснокен, сугонэн тусьты, черъёс медаз алялэ шуыса.
Та дышетсконние, озьы ик Ижысь эшшо 13-яз таӵе школаосы сиён вуттон-пӧран понна сюлмаське нимаз ужась компания. Школалэн директорез Ж. Таранникова пусйиз: ми кемалась ужаськомы ни та огазеяськонэн — со оскымон, сиёнзы ческыт но пиналъёслы тупамон. Сюдӥськом 60 манет тыр, анай-атайёслы вормымон. 86 номеро гуманитарно-юридической лицейлэн сиськон интыяз мукетгес суред усьтӥськиз: столовойзы вӧл-вӧл но туала куронъёслы тупась, нылпиослы ӵектӥсько трос пӧртэм сиён-юонъёс. Кивалтӥсьсы Надежда Заварзина пусъемъя, таослэн но столовоязы сиён дасян понна кыл кутэ нимаз ужась компания. Макем ческыт сюдо школьникъёсты — тае эскерыны быгато анай-атайёс. Соослы котьку школае лыктыны но ӵектэм сиёнъёссэс веръяны луонлык сётӥське.
Нош 97 номеро школалэн столовояз пырыса, малпан кылдэ: вуид кадь кыӵе ке мудрон кафее. Ваньмыз туала сямен чебер радъямын, пӧраськон висъетазы туала оборудование пуктэмын. Столовоязы тыршо асьсэ пӧраськисьёссы, соос арлы быдэ сямен квалификацизэс будэто курсъёсын, пӧртэм конкурсъёсын. Сиён таяз столовойын, 86 номеро школаын сямен ик, ӵектӥське 75 манетэн. 97 номеро школа чакламын пиналъёсты ӝытозь возьыны — кӧтсы сюманы кутске ке, сиён басьтыны быгато школаысь кафеын.
Та школаосын пиналъёсты сюдонлы «Калык контрольысь» эскерисьёс ӟеч дунъет сётӥзы. Ижысь мукет школаослы ӵектозы таослэсь адӟем карыны.