Кун Думаын Удмурт Элькунэн тодматскон ортчиз

Туннэ, 20-тӥ коньывуонэ, Росси Федерациысь Кун Думаын Удмурт Элькунлэн нуналъёсыз усьтӥськизы. Ужрадэ пыриськизы Кун Думалэн Тӧроезлэн воштӥсез Андрей Исаев, Кун Думаысь фракциослэн кивалтӥсьёссы но депутатъёс, Удмурт Элькунлэн Тӧроез Александр Соловьёв, Кун Кенешлэн Тӧроез Владимир Невоструев, Элькун парламентысь депутатъёс но кивалтэтысь ёзчиос.
Ужрад ортчиз Удмуртия кунлыксэ басьтэм дырысен 95 ар тырмонлы сӥзем адзытон дорын. Отын промышленностья, гурт удысъя, дышетонъя, лулчеберетъя элькунлэн вормонъёсыз возьматӥськизы.
Андрей Исаев пусийз шаермылэсь аспортэмлыко луэмзэ но Россилэсь социально-экономической кужмызэ юнматон пумысен ужамзэ.
Удмурт Элькунлэн Тӧроез тау карон кылъёссэ вераз Кун Думалэн кивалтӥсьёсызлы, Удмурт Элькунэз возьматыны луонлык сётэмзы понна понна. Александр Соловьёв вакчияк вераз шаерлэн историез, элькунысь тодмо адямиос сярысь.
Кун Кенешлэн Тӧроез Владимир Невоструев люкаськем калыклы удмурт кылын вазиськиз. Со но Кун Думалы тау карон кылъёссэ вераз.
«Ми Кун Думае асьмелэсь вормонъёсты гинэ адӟытыны ӧм лыктэ. Ми лыктӥм вераны, мае луоз воштыны законодательствоын регионъёслы юрттэт сётон понна. Туж умой, Кун Думаысь 11 комитетъёс милемлы вазиськизы шуыса. Мон оскисько, таӵе ужрад бере, ми, ӝутскем мылкыдын, туж трос ужаломы на страна понна», - пусйиз Владимир Невоструев.
Озьы ик, ужрадэ КПРФ фракцилэн кивалтӥсез Геннадий Зюганов, ЛДПР фракцилэн кивалтӥсез Владимир Жириновский, Кун Думалэн депутатъёсыз, Удмурт Элькунлэн кивалтӥсьёсыз, Кун Кенешлэн депутатъёсыз пыриськизы. Соос Брангуртысь песянайёслэсь но Калык кырӟанъя но эктонъя "Айкай» театрлэсь кырӟан-эктонъёссэс учкизы.