Ижкарын Дмитрий Устиновлы но Михаил Калашниковлы сӥзем синпелетъёс усьтӥзы

10-тӥ шуркынмонэ 2015-тӥ арын Ижкарын ялан ӝуась тыл дорын Советской Союзлэн Маршалэзлы, Социалистической ужысь кык пол Геройлы, Советской Союзлэн Героезлы Дмитрий Фёдорович Устиновлы но Росси Федерацилэн Героезлы, Социалистической ужысь кык пол Геройлы, быдэс дуннелы тодмо конструкторлы Михаил Тимофеевич Калашниковлы синпелетъёсты сиё-дано усьтӥзы.
Ужрадэ Удмурт Элькунлэн Тӧроез Александр Соловьёв, Кун Кенешлэн Тӧроез Владимир Невоструев, Россиысь Президентлэн ПФОын оскем муртэзлэн воштӥсез Юрий Золотарёв, ожысь ветеранъёс, Дмитрий Устиновлэн но Михаил Калашниковлэн ӵыжы-выжыоссы пыриськизы.
Удмурт Элькунлэн Тӧроез синпелетъёсты пуктӥсьёслы тау кылъёс вераз но пусйиз Калашниковлэсь но Устиновлэсь асьме шаерен туж юн герӟаськемзэс. «Михаил Калашников но Дмитрий Устинов асьме шаермылэн быдӟым адямиосыз луо. Соостэк уг луы Советской Союзлэсь но Россилэсь историзэ син азе пуктыны. Соостэк уг луы Удмуртилэсь историзэ син азе пуктыны», - шуиз Александр Соловьёв.
Со сяна, синпелетъёсты усьтон ужрадын вераськиз Кун Кенешысь «Единая Россия» фракцилэн кивалтӥсез Алексей Прасолов.
«Михаил Тимофеевич но Дмитрий Фёдорович – асьмелэн быдӟым шаермылэн зэмос пиосыз. Соос сярысь тодэ ваён котьку асьмемын луоз», - вераз Кун Кенешлэн депутатэз.
Бюстъёслэн ӝуждалазы 92 сантиметр, котькуд памятниклэн быдэс ӝуждалаез 3 метр пала. Авторез - Москваысь скульптор Владимир Курочкин.