Удмурт Элькунысь Егитъёслэн парламентазы пыриз 54 мурт
28.10.2015
Кун Кенеш бордын кылдытэм Егитъёслэн парламентсылэн куинетӥ ӧтчамез кисьмаз. Отчы пыризы 54 егитъёс — соосты толон ортчем сессиын юнматӥзы парламентысь депутатъёс.
Кун Кенешысь Наукая, дышетонъя, культурая но егитъёсын ужан политикая ялан ужась комиссилэн кивалтӥсез Наталья Сударикова ивортэмъя, таяз ӧтчаме ӵектӥськисьёс пӧлын ӟырдыт ӵошатскон ортчиз. Котькудӥз 250-лэсь ятыр кинюртэм, пӧртэм документъёс бичано луиз, но тужгес шурдытэз — аслэсьтыд проекттэ утён. Н. Сударикова пусъемъя, чузъяськизы туж тунсыко малпанъёс-кичӧлтонъёс — соосты коть али ик быдэсты!
Таяз ӧтчаме шедизы 39 пиос но 15 нылъёс. Таос пӧлысь 30-эз конкурс пыр быръемын, кылемъёссэ 24-зэ ӵектӥзы муниципал ёзъёсын кылдытэм егитъёслэн парламентъёссы. Асьсэлэсь кандидатсэс ӵектыны ӧз быгатэ Кез ёрос но Иж гинэ. Таосаз угось та дырозь кылдытэмын ӧвӧл на егитъёслэн парламентсы. Наталья Сударикова оскемзэ вераз, таосыз но таӵе ёзъёс кылдозы шуыса.