Арня ӵоже Россиысь Кун Думаын но Федерация Кенешын ортчизы Удмурт Элькунлэн нуналъёсыз

Сенаторъёс но депутатъёс вераськизы Удмуртилэн азинсконэз сярысь. Ӝутэмын тужгес лэчыт ужпумъёс, эскеремын 30 пала дэмланъёс.
Пумиськонъёсы пыриськизы Удмуртилэн Тӧроез Александр Соловьёв, Кун Кенешлэн Тӧроез Владимир Невоструев, Кун Кенешысь ялан ужась комиссиослэн кивалтӥсьёссы, министръёс, предприятиослэн директоръёссы. Эскеремын пӧртэм ужпумъёс: тазалыкез утён, калыклэн улон-вылоназ юрттэт сётон, лэсьтӥськон, ЖКХ, дышетон, культура удысъёсысь сюлмаськытӥсь юанъёс.
Удмуртилэн нуналъёсызлы яркыт мылкыд пыӵатӥзы Брангуртысь песянайёс.
Нырысь нуналаз ик Кун Думаын усьтӥськиз Удмуртилэн кунлык басьтэмез дырысен 95 ар тырмонлы сӥзем адӟытон. Отын возьматэмын вал ваньмыз, маин данъяськыны быгатэ Удмуртия: промышленность, гурт удыс, дышетон, культура. Кылсярысь, одӥгез стенд быдэсак сӥземын быдӟым композиторлы П. Чайковскийлы, мукет азьысь адӟыны луиз гуртоослэсь быгатыса ужамзэс, йӧл-вӧй поттэмзэс.
Элькунмылэн Тӧроез Александр Соловьёв пусйиз:
— Удмуртилэн луонлыкъёсыз бадӟымесь, асьме сярысь быдэс кунмылы кылымон вераны дыр вуиз!
Александр Васильевич вакчияк мадиз республикамылэн историез, валтӥсь проектъёс, программаос, данъяськымон адямиос сярысь.
Нош Кун Кенешлэн Тӧроез Владимир Невоструев ваньмызлы вазиськиз удмурт сямен.
— Татчы ми асьме быгатэммес возьматыны гинэ ӧм вуэ, лыктӥм дэмланъёсмы сярысь вераны: улосъёсты ӟечгес азинтон понна мае воштыны луоз федерал законъёсысь.
Презентация дыръя ик Кун Думалэн Тӧроезлэн воштӥсез Андрей Исаев вылӥ дунъяз Удмуртилэсь тыршемзэ, кунмылэсь экономиказэ юнматыны юрттэмзэ.
Адӟытонын кырӟазы-веразы «Айкай» но Брангуртысь песянайёс. Соос яркыт презентацилы вунонтэм чебер мылкыд пыӵатӥзы. Со сяна, татын ик возьматэмын вал Удмурт Республикалы сӥзем фильм.
Кун Кенешысь ялан ужась комиссиослэн кивал-тӥсьёссы, шаерысьтымы министръёс пыриськизы Кун Думаысь 11 комитетъёслэн ужазы, Федерация Кенешлэн 6 комитетэзлэн заседанияз.
Троссэ заседаниосты онлайн амалъя учкыны луиз Федерация Кенешлэн «Вместе-РФ» телеканалэз пыр. Асьме Кун Кенешлэн но Правительстволэн дэмланъёссы сӥземын вал республикаямы субсидиос, инвестициос кысконэн. Со сяна, дасямын вал федерал законъёсы, пӧртэм программаосы ӵектонъёс.
Обороная но кышкытлыклэсь утиськонъя комитетлэн кивалтӥсезлэн воштӥсез Александр Чекалин пусйиз:
— Удмуртия — Россилэн обороная щитэз. Отысь «Купол», «Калашников» концерн но мукет заводъёсын дасо сюрсъёсын адямиос тыршо. Вылӥ ӟечлыко ожгар тӥрлык мед поттозы шуыса, соослэн тазалыкез утёнъя, тодон-валан люканъя, правооссэс утёнъя зол инъетсы луыны кулэ.
Александр Чекалин ивортӥз: туннэ нуналлы дасямын ини Федерация Кенешлэн Удмуртилы юрттонъя постановлениезлэн проектэз. Соя чакламын шаерысьтымы машина поттонлы юрттыны, ИжГТУ-лэн инъетэз вылын кампус но технопарк кылдытыны, Вылӥ технологиосъя институтлэн инъетэз вылын — космослы чаклам техника кылдытонъя центр усьтыны но трос мукетыз.
Огъя ужамлы дунъет выллем луиз ни Федерация Кенешын субъектлэн часэз дыръя вераськон. Республикамылэн улон-вылонэз, азинсконэз сярысь докладъёс лыдӟизы Удмуртилэн Тӧроез Александр Соловьёв но Кун Кенешлэн Тӧроез Владимир Невоструев.
Федерация Кенешлэн Тӧроез Валентина Матвиенко соослы тау кариз, Удмуртилы сӥзем адӟытонэз но туж вылӥ дунъяз. Но нимысьтыз, сюлмысь ик тау шуиз Брангуртысь песянайёсмылы. Спикер шуиз: Удмуртия тунсыко но туж тыршись республика. Быдӟым Вормонэз дуронын но со туж трос лэсьтӥз. Ожгар тӥрлык гинэ, фашист Германилэн вань заводъёсыныз ӵошатыса, кык поллы тросгес поттӥз.
Валентина Матвиенко озьы ик нимысьтыз пусйиз Удмуртиын машина поттонъя кластер кылдытонэз. Со, пе, быдэс кунмылы туж кулэ. Соин ик Россиысь Правительстволы вазиськоно, вуоно арысен та проектэз пыӵатонлы субсидиос мед висъяськозы шуыса.
— Туннэ нуналлы Россиын импортозамещение удысын проектъёсъя Удмуртия 3 устоосыз пӧлы пыре. Республикалэн 46 проектэз пыриз федерал планэ. Та туж ӟеч! Угось вераськон мынэ дасо миллиард ватсаса вуоно коньдон сярысь. Туэ январьысен ини быгатыса пыӵатӥськоды кунгож сьӧрысь продукциез республикаын поттэменыз воштонъя планэз. Тӥлесьтыд адӟем карыны кулэ мукет улосъёслы но, — пусйиз Валентина Матвиенко. Со дыре ик паймиз:
— Туннэ нуналлы республикаын бичам вытъёс пӧлысь 33 процентлэсь кӧнялы ке тросэз гинэ доразы кыле, ваньмыз кошке федерал бюджетэ. Сыӵе югдур шонер ӧвӧл, малпаськыны кулэ, кызьы тае воштыны луоно.
Валентина Матвиенко пусйиз туризмез но. Куинь ар ӵоже Удмуртилы синмаськемъёс кык поллы тросгес луизы, пе.
Закон бордын ужанэз чаклано ке, берло аръёсы Удмуртия федералъёслы 22 выль законопроект дэмлаз. Зэм, федерал закон луиз 2 -ез гинэ. Озьы ке но Валентина Ивановна Федерация Кенешлэн ёзчиосызлы вазиськиз:
— Улосъёсысь законопроектъёс пӧртэмесь луо, кытӥяз соос бордын ватсаса ужано, мазэ ке тупатоно, но интыосысь парламентарийёс калыклы матынгес.
— Мон тау карысал Удмуртилэн командаезлы зэмос профессионалъёс луэмзы понна. Соос вань сюлмаськытӥсь юанъёссэс пыр-поч радъяны быгатӥзы, — паймемзэ вераз Федеративной устройствоя, улосъёсын политикая, интыысь аскивалтонъя но Уйпаллэн юанъёсызъя комитетлэн кивалтӥсез Дмитрий Азаров. — Федерация Кенешын куать комитетын Удмуртиысь ужпумъёс эскериськизы. Та — рекорд!
Туннэ нуналлы республикаын бичам вытъёс пӧлысь 33 процентлэсь кӧнялы ке тросэз гинэ доразы кыле, ваньмыз кошке федерал бюджетэ.

Александр Соловьёв, Удмурт Республикалэн Тӧроез:
— Кутэмын Удмуртилы юрттонъя Федерация Кенешлэн постановлениезлэн проектэз. Та документ — огъя ужаммылэн емышез, Федерация Кенешлэн ёзчиосызлэн, Кун Думалэн, асьме Правительстволэн но Кун Кенешлэн. Та нуналъёсы Москваын эскерем ужпумъёс Удмуртиен гинэ герӟаськемын ӧвӧл ук. Со выллем шугъяськонъёссы вань Россиысь тросаз субъектъёсын. Соин ик вань со ужпумъёсты огкылысь вырӟытоно.
Удмурт шаермы туннэ ваньмызлы усьтэмын. Тужгес но инвесторъёслы. Нош Удмуртилэсь арзэ Москваын ортчытэм, федерал кивалтӥсьёсын юнгес кусып тупатэм бере оскисько: республикамы ӟечгес азинскыны кутскоз.

Владимир Невоструев, Кун Кенешлэн Тӧроез:
— Шумпотӥськом, Кун Думаысь но Федерация Кенешысь вань комитетъёсын пумиськонъёс гань-гань, ог-огмес валаса, ортчизы. Федералъёсты оскытыны быгатӥм: республикамылы азинскон понна уг тырмы коньдон. Соин ик банкъёсысь басьтэм коммерческой кредитъёсты воштоно Россиысь Минфинэн висъяськись уксёен.

Федерал законъёсы Удмуртилэсь дэмланъёссэ Федерация Кенеш ӟечен пусйиз. Соин ик, малпасько, азьланяз милемлы Кун Думае но Федерация Кенеше ӧсъёс усьтэмын луозы.
Оскисько: Москваын таӵе яркыт ужрадъёс бӧрсьы ми эшшо ӝутскем мылкыдын ужалом, асьме республикамы понна тросгес лэсьтыны быгатом.