Наиль Мухамедзянов Удмуртиысь Кун Кенешлэн Тӧроезлы воштӥсе быръемын

Кун Кенешысь коньдэтъя, вытъёсъя но коньдон ужпумъёсъя ӧриен кивалтӥсь Наиль Мухамедзянов Кун Кенешлэн Тӧроезлэн воштӥсез луиз. Лушкем амалэн куара сётонлэн йылпумъянъёсызъя сыӵе пуктэт элькун парламентлэн 14-тӥ сессияз кутэмын. Наиль Мухамедзянов понна 48 депутатъёс дурбасьтӥзы, одӥгез пумит вал.
Кун Кенешлэн Тӧроез Владимир Невоструев Наиль Мухамедзянов вылӥ быгатонлыко депутат луэ шуыса пусйиз. Со элькун парламентэ куинь пол быръемын ни. Солэсь азьвыл куинь пол быръемын вал Ижкар Думае. Отын со коньдэтъя но коньдон ужпумъёсъя ӧрилэн кивалтӥсезлэн воштӥсез вал.
Наиль Мухамедзянов Удмуртиысь Кун Кенешлэн Тӧроезлэн воштӥсез – коньдэтъя, вытъёсъя но коньдон ужпумъёсъя ӧриен кивалтӥсь луыса аслаз ужезлэсь куштӥськытэк ужалоз, коньдэт чотын со уждун уз басьты.