Анай кыллэн нуналэзлы сӥзьыса, Кун Кенешлэн юртаз ортчизы 27-тӥ «Герд лыдӟонъёс»

Солэн ужаз пыриськизы Удмуртиысь но солэн палэнысьтыз дышетӥсьёс, гожъяськисьёс, тодосчиос, пиналъёс, «Удмурт Кенеш» огазеяськонлэн ёросъёсысь ёзчиосыз. «Герд лыдӟонъёсты» усьтӥз но нуиз Кун Кенешысь лулчеберетъя, туризмъя но йӧскалык политикая ялан ужась ӧрилэн тӧроез, «Удмурт Кенеш» огазеяськонлэн кивалтӥсез Андрей Ураськин. Ужрадэ пыриськиз Кун Кенешлэн Тӧроез Владимир Невоструев.
Таиз ужрад сӥземын вал Максим Прокопьевлэн вордскемез дырысен 140 ар тырмонэзлы. Дышетон удысысь йӧскалык ужпумъёсты эскеронъя тодос институтысь, Россиысь тодосъя академилэн Урал ёзысьтыз Удмурт федерал центрлэн Историяя, кылъя но литературая удмурт институтысь тодосчиос но мукетъёсыз Максим Прокопьев сярысь дасям ужъёссэс шара лыдӟизы.
Ужрад дыръя ик сӥлы каризы Кузебай Герд нимо премилэсь лауреатъёссэ. Туэ та премиез басьтӥзы Дэри ёросысь Лудорвай школалэн кивалтӥсез, удмурт кылъя дышетӥсь Надежда Мерзлякова но «Удмурт Кенеш» огазеяськонлэн гимнэзлэн одӥгез авторез, Ижын улӥсь Алефтина Корепанова.
Лыдӟонъёсын Максим Прокопьевлэн кылбуръёсыз чузъяськизы. Кузебай Герд нимо гимназиысь «Выль крезьгур» студиысь пиналъёс калык кырӟан быдэстӥзы, нош Татарстанысь Кукмор ёросысь, кылбурчилэн вордскем палысьтыз, «Инвожо» калык ансамбль усто концерт возьматӥз. Лыдӟонъёс улсын удмурт азьветлӥсьлэн ужъёсыныз, со сярысь книгаосын, пӧртэм ужкагазъёсын но туспуктэмъёсын адӟытон ужаз.