Владимир Невоструев пыриськиз «наливайкаосын» нюръяськонлы сӥзем кенешонэ

Элькун Тӧро Александр Бречалов ортчытӥз «наливайкаосын» нюръяськонлы сӥзем кенешонэз. Отчы пыриськизы Кун Кенешлэн Тӧроез Владимир Невоструев, пӧртэм министерствоослэн но ведомствоослэн кивалтӥсьёссы. Кенешонэз Александр Бречалов кутскиз кылем арлы йылпумъянъёс лэсьтон бордысен:
«Курыт юонъёсын сэрен шугектӥз 351 адями, со пӧлысь 156 адямиез утьыны оз луы ни. Кудӟытӥсь юонъёсын лушкем вуз карисьёсын нюръяськон шаерамы мынэ ни кӧня ке ар ӵоже. 2019-тӥ арын элькунысьтымы Кун Кенеш вазиськиз Россиысь Кун Думае, ӵектӥз: «наливайкаосын» нюръяськон вылысь улосъёслы полномочиос сётоно. Кылем арня вискын Кун Дума ӵектонэз куинетӥ лыдӟонэн юнматӥз. Со улонэ пыӵаны кутскиз ке, калыклы курытсэ ӵектӥсьёс-вузасьёс азе (магазинъёс, кафеос, буфетъёс) улосмы аслэсьтыз куронъёссэ пуктыны быгатоз. Чакламъя та закон пыӵаны кутскыны кулэ туэ 1-тӥ апрельысен».
Потребительёслэн правооссэс утёнъя но калыкез утёнъя федерал службалэн кивалтӥсез Наталья Матюшина ивортэмъя, кылем арын, курытсэ веръяса, шуге-леке вуизы 51 быдэ вуымтэос. Тӧро Александр Бречалов вазиськиз Правительстволэн Тӧроезлэн воштӥсезлы Татьяна Чураковалы: пиналъёссэс йӧнала чакласьтэм анай-атайёсты золгес чаклано, пиналъёс пӧлын валэктон ужез паськытгес радъяно. Удмуртиын пыӵа «Наливайкам НЕТ» интерактивной карта. Со пыр калык ивортыны быгатэ курытэныз лушкем вуз карись ларёкъёс, лавкаос сярысь. Отчы пыртэмын ни 162 магазин, таос нылпиослы но кудӟытӥсьсэ вузало вылэм. Лавкаосты чакланы потало «Егит гвардия» огазеяськонэ пырисьёс, югдурез утисьёс. Та дырлы 11 ларёк пытсамын ни, ӝоген мукетъёсыз но сэрттэмын луозы.