Шаркан черкогуртын усьтӥськиз Григорий Титовлы синпелет

Удмуртиысь калык артистлы Григорий Титовлы синпелет усьтӥськиз Шарканын. Со пуктэмын черкогуртлэн тужгес ӟеч интыяз, вырйылын, искусствоосъя школа вӧзын.
Сиё-дано ужрадэ вуылӥзы Кун Кенешлэн Тӧроезлэн воштӥсез, тодосъя, дышетонъя но граждан обществолэсь институтъёссэ азинтонъя ялан ужась ӧрилэн кивалтӥсез Татьяна Ишматова, Кун Кенешысь лулчеберетъя, туризмъя но йӧскалык политикая ялан ужась ӧрилэн тӧроез, «Удмурт Кенеш» огазеяськонлэн кивалтӥсез Андрей Ураськин, Шаркан ёрослэн тӧроез Василий Муклин, Удмуртиысь искусство удысын дано ужась, хормейстер Валерий Митрофанов, скульптор Анатолий Аникин, «Удмурт Кенеш» огазеяськонлэн ёросъёсысь кивалтӥсьёсыз, Георгий Титовлэн ӵыжы-выжыосыз но гурт калык.
Шаркан кылдытэтлэн тӧроез, «Удмурт Кенеш» огазеяськонлэн ёросысь кивалтӥсез Елена Перевозчикова пыр-поч мадиз, кызьы та синпелетэз пуктонъя уж мынӥз. Солэн верамезъя, уж нуиськиз ини 2015-тӥ арысен. Нырысь малпамын вал мемориальной пул гинэ усьтыны, но пумен-пумен, огъя кужымен, калыклэн, спонсоръёслэн юрттэменызы, инициативное бюджетировние программалы луыса, ӝутӥськиз синпелет. Памятниклэн дуныз - 1 миллион 740 сюрс манет тыр луиз.