Георгий Крылов «Удмурт дунне» газетлы интервью сётӥз

— Георгий Степанович, адямитэк ужась техника бусыосты гыроз ни, шуо...

— Но со понна компьютерез валась адямиос кулэ, нош соос гуртэ уг мыно. Техника но тӥяськытэк ужаны уг быгаты. Туала ужан амалъёсты, техникаез лыдэ басьтоно ке, котькуд 150 гектар гыроно-кизёно музъемлы кулэ 1 механизатор. Гурт удыс огсыр азинскоз соку гинэ. Западын техниказы кужмогес бере, отын 250 гектарлы быдэ 1 ужась кулэ. Котькуд механизатор шорлыдын ог 30 ар ужаны быгатысалыз ке, шаерамы 6 сюрс 600 тракторист кулэ луысал. Но котькудӥз сомында ужаны уг вормы. Туннэ растениеводство удысын ог 5 сюрс адямиос тыршо. Механизаторъёс мед тырмозы шуыса, арлы быдэ ватсаса кулэ ог 220 адями. Егитъёс пӧлын гурт удыс шоры учкылӥсез туж ӧжыт. Дышетонъя но наукая министерстволы юан сётъяй: быгатомы-а ми арлы быдэ сомында кадр будэтыны? Туннэ та юанлы валэктон ӧвӧл. Асьмелэн Уваын, Сарапулын, Алнаш ёросысь Асан совхоз-техникумын но мукет азьын училищеосмы вань. Арлы быдэ вань удысъёсысь техникумъёсы, колледжъёсы, 9-тӥ классэз йылпумъяса, ог 9 сюрс пинал профессия басьтыны пыре. Киязы диплом вуэм бере уже интыясько ог 5 сюрсэз, ог 300-эз самозанятой я ужбергатӥсь карисько. Но музъемен ужаны 20-ез но уг лыкты.

— Егитъёсты гуртэ кызьы кельтоно?

— Гуртын уждун пичи, шуо. 50 сюрс манетэз коньдонэн уг лыдъяло ни. Гуртын угось трос ужаны кулэ. Сомында ик ужаса, городын 70 сюрс манет но басьтомы, шуо. Калыкез уд пӧя. Уноез, кылсярысь, Татарстанысь Елабугаысь заводъёсы интыясько, отын ичизэ 110 сюрс манет басьто. Юн хозяйствоосысь но али механизаторъёс уллёен Ижысь обороная заводъёсы кошкыны кутскемын. Асьмелэн гурт удысэз азинтонъя кӧня ке арлы планмы луыны кулэ. Соку калык но валалоз, мар сое возьма, кыӵе юрттэт висъяськоз. 1-5 ар хозяйствоын ужамъёслы корка сётъяськысал ке, та но калыкез гуртэ кельтысал. Татарстанысь гуртъёсын лачак коркаос пуктыло, ужасьёссы соосты рыночной дунзылэсь 1 процентэн асьсэлы басьтыны быгато. Со сяна, нылкышноослы тросгес ужан интыос кылдытон сярысь сюлмаськоно. Кылсярысь, уногес усьяно переработкая цехъёс. Соку заводъёслы но конкурентъёс кылдозы. Гуртысь магазинъёсы ӟеч вуз вуоз. Озьы гуртысь экономикаез ӝутыны луысал.

— Фермае лыктӥсь соку воксё уз луы, чылкыт интыын ужамзы потоз.

— Роботъёс адямиосты воштозы. Мукет амал ӧвӧл. Но туннэ музон юан кылдэ: малы Россиын роботъёсты уг бичало? Германиысь, Израильысь заводъёсты весь узырмытомы шат? Удмуртиысь хозяйствоос ик арлы быдэ ог 2 миллиард манет тыр робот басьясалзы. Асьме дорын лэсьтэм роботъёс дунтэмгес луысалзы, соосты уногес хозяйствоос ӝоггес басьтыны быгатысалзы. Удмурт кун университетысь, Ижысь техникая кун университетысь, Удмурт аграрной кун университетысь тодосчиосын та пумысен вераськылӥ. Ӵектӥськод, юан сётӥськод но, синъёссэс вато. Туннэ соослы та кулэ ӧвӧл. Туннэ ректоръёсты мукетыз сюлмаське: кызьы 1-тӥ курсэ студентъёсты люкано, милесьтым дышетскисьёсмес Москва гочатэ шуыса куректо. Конешно, тодосчиосмылэн куд-ог тунсыко разработкаоссы вань, но жаляса верано, соослэн малпам проектъёссы производстволэсь кыдёкын. Гуртысь ужез капчиятон, экономикаез ӝутон сярысь йырзэс висьытэмзы уггес поты. Туннэ производство одӥг ужпум пуктэ, нош наука аслаз улонэныз улэ.

— Кызьы та югдурысь потоно?

— Та ужпум вераськонэн гинэ медаз кыльы — таӵе ужпум пуктэ Кун Кенешысь комиссимы. Югдур арысь аре лэчытомоз. Ужасьёс ялан мӧйымо, гуртъёс бушало. Туннэ ужась сюре на бере, уноез уг ик малпасько, мар луоз ӵуказе. Но куд-ог хозяйствоос дорамы вазиськыло ни, шуге-леке вуимы шуыса. Югдур ӧз воштӥськы ке, 5 ар ортчыса, ог 20 процентэз хозяйствоос амалтэк пытсаськоно луозы, ужась тырмымтэен. Кышкан вань, ог 8-12 ар ортчыса, шаерамы мегафермаос котырын гинэ улон пӧзёз на шуыса. Али хозяйствоос гуртъёсты ӝутон сярысь сюлмасько ай, нош отӥяз кӧня ке гинэ предприятиос кылизы ке, сюресъёсты, соцобъектъёсты возись, калыклы юрттӥсь чарак кулэсмоз. Вавож ёросысь «Колос», «Удмуртия», Можга ёросысь «Родина», «Россия» кадь кужмо хозяйствоос но шуге вуыны быгатозы. Татын али калык сярысь сюлмаськыса ужало, уж сёто, ӟеч уждун тыро. Кылсярысь, Шаркан ёросысь «Ошмес» но «Восход» хозяйствоосын ог 600 адями тырше, быдэс Вотка ёросысь гурт удысын сомында ужасез ӧвӧл. Но уноезлы хозяйствоослы трос адямиос кулэ ӧвӧл, коньдонзэс ширъяса, куддыр уждунэз но конвертэн тыро, соос ик экономика ласянь юнэсьгес луо, ӝоггес азинско. Гурт улон ӟечгес луыны кулэ, городын сярысь. Соку калык выльысь гуртъёсы выжыяськыны ӧдъялоз. Та сярысь али сюлмаськоно. Вотка ёросысь «Пихтовка» хозяйствоез но калыклы пӧртэм льготаос, набавкаос, бадӟым уждун тыремез пумысен ялан куарето, калык понна кисьтэм коньдон интые производствоын зол модернизация лэсьтыны луысал, унозэ адямиосты роботъёс воштысалзы, шуо. Со тужгес капчиез амал. Нош калык мар карыны кулэ? Туннэ ваньзэ лэсьтоно, стратегия малпано хозяйствоосты, калыкез утён вылысь.