Туннэ Ижысь Эшъяськон юрт азьын ортчиз шаерамы улӥсь пӧртэм калыкъёслэн парадзы

Удмуртиын 100 пала пӧртэм калыкъёс уло, 40 пала калыкъёслэн огазеяськонъёссы вань. Соосты ас бурд улаз возе шаерысьтымы Калыкъёслэн Эшъяськон юртсы. Солы та нуналъёсы 15 ар тырме. Та юбилейлы сӥзьыса ик, калыкъёслэн парадзы Эшъяськон юрт азьын ортчиз. Отчы пыриськизы Кун Кенешысь лулчеберетъя, туризмъя но йӧскалык политикая яялан ужась комиссилэн кивалтӥсез, «Удмурт Кенеш» огазеяськонлэн тӧроез Андрей Ураськин, Кун Кенешысь «Единая Россия» фракцилэн кивалтӥсезлэн воштӥсез Любовь Зайцева.
Чебер парад сяна, ужрадын пӧртэм калыкъёс асьсэ сиён-юонъёсынызы куноязы, татын ик кибашлыос калык киужъёсын вырыны дышетӥзы. Яркыт концертэн паймытӥзы кырӟась-эктӥсьёс. Ужрад йылпумъяськиз котыртэме султыса эктонэн – эшъяськон хороводэн.
Эшъяськон юртлэн вордӥськем нуналызлы сӥзем ужрадъёс азинскозы на 15 сентябрёзь.