Кун Кенешлэн сессияз шаерамы «Культура» нацпроектлэн улонэ пыӵамез сярысь вераськизы

Удмурт Элькунысь Кун Кенешлэн сессияз шаерамы «Культура» нацпроектлэн улонэ пыӵамез сярысь вераськизы. Депутатъёс азьын докладзэ лыдӟиз культурая министр Владимир Соловьёв.
2019-тӥ арысен Удмуртиын 187,4 миллион манетлы 8 культурая юрт пуктэмын, 55,4 миллионлы 15 культурая юрт тупатэмын вал. Со сяна 2 ар ӵоже йылаз-пумаз вуизы Йӧскалык библиотекаез тупатъян ужъёс. Ёросъёсын 14 кинозал усьтэмын. Федерал бюджетысь 75 миллион но элькун бюджетысь 15 миллион быдтэмын Ижкарын, Воткинскын, Сарапулын, Глазовын, Можгаын, Ува, Сюмси но Сарапул ёросъёсын 12 модельной библиотекаосты усьтонлы. М. Т. Калашников, П. И. Чайковский нимо но К. Герд нимо Йӧскалык музейын мультимедиа-гидъёс кылдӥзы. Туэ сыӵе ик гид вуоз Глазовысь шаертодонъя музее. Балезино, Глазов, Ува, Сарапул, Можга, Эгра, Воткинск но Дэри ёросъёсын автоклубъёс кылдӥзы. Ижкарысь искусствоосъя вань школаосы, Элькунысьтымы крезьгуръя но культурая колледжъёсы крезьгуро инструментъёс басьтэмын вал. Воткинскысь искусствоосъя 2-тӥ номеро школа тупатъямын вал. Юрттэт сётэмын вал Мунё театрлы. Туэ коньдон висъяськоз Сарапулысь драмая театрлы но Глазовысь «Парафраз» театрлы.