Кун Кенешын 11 арлэсь ятыр ини егитъёс понна урокъёс ортчыло

Удмурт Элькунысь Кун Кенешын 11 арлэсь ятыр ини егитъёс понна урокъёс ортчыло. Вормон нунал азьын радъям уроке, Ижысь 97 номеро но Дэри ёросысь Ягул школаосысь нылъёс но пиос сяна, вуылӥзы Россиысь МЧС-лэн Удмуртиысь управлениеныз кивалтӥсь Пётр Фомин, Следствиея комитетлэн Удмуртиысь управлениеныз кивалтӥсь Рустам Тугушев, «Генеральное собрание» огазеяськонлэн тӧроез Григорий Желудов, парламентысь «Единая Россия» фракцилэн кивалтӥсез Елена Дербилова, история наукаосъя кандидат, политолог Наталья Бармина. Ужрад ортчиз «Ми — вормисьёслэн поколенизы» ӧтён улсын. Урокез усьтӥз Кун Кенешлэн Тӧроез Владимир Невоструев.
«Егитъёсын ужано дугдылытэк, тужгес но али, куке Быдӟым ожысь геройёсмы улэпесь на, куке Украинаын спецоперация мынэ. Нылъёс но пиос ноку но медаз вунэтэ, макем секытэн сётӥськиз асьмелы вормон. Кун Кенешлэн сямаз пыӵамын ини школаосын Атыкай музъемлы сӥзем пумиськонъёс радъяллян. Соос огез но мӧзмыт уг ортчо. Пиналъёс паймыса кылзо ожгарчиослэсь, ветеранъёслэсь ожмаськемзы, улэмзы сярысь мадемъёссэс», - шуиз Владимир Невоструев.
Афган но чечен ожъёсысь ветеран, Горд Кизили орденлэн кавалерез, Россиысь «Боевое братство» огазеяськонлэн Удмуртиысь ёзэныз кивалтӥсь Игорь Быков тодаз вайиз, кызьы егит вакытаз Украинаын службаез ортчиз, кызьы Афганистанын душманъёслы пумит нюръяськиз.
«1980-тӥ аръёсы ик Украинаын кузёяськылӥзы ини бандеровецъёс но нацистъёс. Ӟуч солдатъёсты, лушкем кырмыса, тышкало вал. Соку ик шӧдӥськиз ини соослэн сьӧсь луэмзы. 1986-тӥ арын Афганистанын трос эшъёсме ыштӥ. Душманъёс Америкаысь вуттэм стингеръёсын уно вертолётъёсмес но самолётъёсмес пазьгизы. Америка моджахедъёсты, Пакистанын ожмаськыны дышетыса, афган войнае вуттылӥз. Чечняе но солдатъёссэ келялляз. Али ке но син азям на Латвиысь но Литваысь нылкышно снайперъёс. Ожмаськыны сыӵе зол дышетскемын вал — киоссы дырекъятэк, асьме солдатъёсты быдтылӥзы. Ай винтовкаязы ӵабъяллязы, кӧнязэ виизы... Туннэ Украинаын синкыли кисьтӥське. Тодӥсько, кунмы сьӧсьёсты вормоз!» - вераз Игорь Быков.
Политолог Наталья Бармина вераз историез выль сямен гожтыны вырисьёс сярысь.
«Западысь тросэз кунъёс али, Быдӟым ож сярысь вераськон ӝутскыку, юромо вунэто, кӧня кужымзэ сётӥз Совето Союз вормонлы. Нош кужымез солэн, зэмзэ но, пыдэстэм вал. Странамылы пумит соку, Германия сяна, султӥзы Венгрия, Румыния, Словакия, Финляндия, Италия. Тамында кунъёслы пумит ожмаськыны ӧм кышкалэ. Ваньзэсты вормим! Сомында заводъёсмы, предприятиосмы, культурая, дышетонъя, наукая учреждениосмы эвакуациез ортчизы. Та пумысен немецъёслэн сухопутной войскоосынызы кивалтӥсь Франц Гальдер дневниказ йырез кур карись чуръёс гожтэм: Сталин Гитлерлы тау мед шуоз. Гитлер юрттӥз Совето Союзлы промышленностьсэ кылдытыны. Та ужез быдэстонлы 25 ар кулэ луысал, нош со 2 ар куспын быдэсмиз... 2015-тӥ арын шараямын вал 1945-тӥ арысь «Немыслимая» операция сярысь документъёс. Вормон бере Великобритания, Германия но Америка Совето Союз вылэ выльысен омырскыны малпало вылэм. Но дӥсьтӥллямтэ. Та малпанзэс быдэсто, лэся, али — Украиналэн музъем вылаз. 77 ар ӵоже вунэтӥллям, макем кужмо Россия!» - пусйиз Наталья Бармина.
Урокын перемена но вал: кырӟазы-веразы Марина Галичанина, Даниил Решетников, «Забава» ансамбльысь воргоронъёс. УФСИН-ын, МВД-ын али гинэ ужаны кутскем нылъёс но пиос присяга сётӥзы.