Куамын куатетӥ сессилэн ужанрадаз ватсаса ужпумъёс пыртэмын

Туннэ Кун Кенешлэн Президиумез куамын куатетӥ сессилэн ужанрадаз ватсаса ужпумъёсты пыртӥз. Озьы ӵуказе, сессилэн кыкетӥ кенешоназ, 28 ужпум сэрттэмын-пертчемын луоз, 14-ез со – элькун катъёслэн ӵектосъёссы. Кыкетӥ лыдӟемен эскеремын луозы Элькунлэн вуоно аръёслы бюджетэз но эмстрахованияя улосвыл фондлэн коньдэтэз сярысь катӵектосъёс.
Со сяна, сессилэн ужанрадаз пыртэмын анай-атайтэк кылем пиналъёслы улон инты висъянъя, Кун Кенеше депутатъёсты быръёнъя но Удмурт Элькунлэн Кун Кенешез сярысь законъёсы воштонъёс пыртон сярысь катӵектосъёс.
Нырысетӥ лыдӟемен эскерыны чакламын культура удысын кун политикаез быдэсъян сярысь инъет луись катӵектос. Со кун политикалэсь культура удысъя ужпумъёссэ, амалъёссэ, быдэсъясь ёзъёссэ но соослэсь ужоскетъёссэс, театръёслы, филармониослы, концерт огазеяськонъёслы юрттэт сётон ужрадъёсты пусъе, озьы ик культура удыслы ӧнерчиосты дасянэз чакла.
Сессилэн пумаз кивалтэт час улсын Элькун Кивалтэтысь экономикая блоклэн ужамез сярысь вераськон радъяськоз.