«КПРФ» депутат фракцилэн кивалтӥсез Пётр Басов гурт предприятиысь азинлыко ужасьёсты ӟечкылаз

Кун Кенешысь «КПРФ» фракцилэн кивалтӥсез Пётр Басов Пичи Пурга ёросысь «Радуга-Агро» гурт предприятиысь азьмынӥсь ужасьёсты данъетъёсын пусйиз. Предприятие туннэ одӥгез ӝог азинскисез гурт возёс луэ. Кивалтэ соин Кун Кенешысь депутат Павел Чушъялов.
Предприятиын 2021 арын ужамзылы йылпумъянъёс лэсьтӥзы. Кызьы пусйиз Павел Чушъялов, туэ кӧс гужем возёсын 2145 тонна ю тысь кутсамын, котькуд гектарысь со 20 центнерен люкаськиз. Скаллы быдэ 6100 кг йӧл кыскемын. Кылем арын 5426 кг вал. Пудоос уй-нунал ӵоже шорлыдын 917 граммлы куайизы, кылем арлэн та вакытэз ӵоже 625 граммлы будӥзы вал.
«Радуга-Агро» огазеяськонлэн кивалтӥсез, Кун Кенешысь депутат Павел Чушъялов но Кун Кенешысь «КПРФ» фракцилэн кивалтӥсез Пётр Басов ужасьёслы тыршемзы понна тау каризы но устоосызлы данъетъёс сётъязы. Кун Кенешлэн Данъян грамотаеныз пусъемын предприятилэн управляющийез Николай Базин. «Радуга-Агро» огазеяськонлэн директорезлы Лариса Наумовалы Кун Кенешлэн Тӧроезлэсь Тау каронзэ сётӥзы. Предприятилэн коньдон премиосыныз но Пичи Пурга ёрос Администрацилэн Данъян грамотаосыныз пусъемын азьмынӥсь ужасьёс.
Ужлы йылпумъянъёс лэсьтэм бере, калык коллективъёс но Удмурт Элькунлэн калык артистэз Геннадий Ганьков концерт возьматӥзы.