Владимир Невоструев: Ваньдэс ӧтисько кунмылэн азинтӥськонэз понна куара сётыны

Туннэ Россиын Федерал Собранилэн Кун Думаяз быръёнъёс кутскизы. Удмуртиын, мукет улосвылъёсын сямен ик, быръёнъёсъя участокъёс интыысь дыръя 8.00 часысен усьтӥськизы. Кун Кенешлэн Тӧроез Владимир Невоструев куаразэ сётӥз Дэри ёросысь Октябрьский посёлокысь быръён участокын.
Элькун парламентлэн спикерез пусйиз – Кун Думае быръёнъёс – кунмылэн улоназ бадӟым но туж кулэ ужрад. «Кун Думалэсь тямысэтӥ ӧтчамзэ бырйиськом. Мон тямысэтӥ ползэ ик пыриськисько таӵе быръёнъёсы. Кунмылэн азьланез, огсыр улонэз понна куара сётон - со туж дано но туж кулэ уж. Шаерысьтымы вань улӥсьёслы вазиськисько куара сётонэ пыриськыны ӧтьыса. Россиямы мед азинтӥськоз но арысь аре кужмогес мед луоз», - шуиз Владимир Невоструев.
Туэ куара сётон куинь нунал ӵоже кыстӥськоз – туннэ, кӧснуналэ но арнянуналэ. Быръён участокъёсын кышкыттэмлыкъя вань куронъёс быдэсъясько – пырисьёслэсь температуразэс эскеро, соослы маска, перчаткиос сёто.
Тодады вайытом, Кун Думае депутатъёсты сяна, Удмуртиысь 25 ёросъёсын муниципал округъёсысь кенешъёсы депутатъёсты быръён мынэ. Быръён участокъёс вань куинь нунал ӵоже 8.00-сен 20.00 часозь усьтэмын луозы.