Удмуртиын фермерлэсь нуналзэ пусйизы

Эгра ёросын 9 куарусёнэ «Удмурт Элькунысь фермерлэн нуналэз - 2021» элькун праздник ортчиз. Туннэ шаерамы 1000-лэсь ятыр крестьян но фермер возёсъёс пусъемын. Арлы быдэ соослэн лыдзы йылэ. Кун ласянь пичи гурт предприятиослы юрттэт сётон паськыта: грантъёс висъясько, «Семейная ферма», «Начинающий фермер», «Агростартап» ӵектосъёс быдэсъясько, «Я – фермер» акселератор ужа, гурт кооперативъёслэсь материально-технической инъетсэс юнматыны коньдон сётӥське.
Та нуналъёсы Удмуртиысь гурт возёсъя Министерство «Агростартап-2021» вожвылъяськонлы йылпумъянъёс лэсьтӥз. Отын 22 адями грант утӥз. Ужзэс кутскыны мылкыд карись фермеръёслы чаклам грантъёслэн огъя быдӟалазы 80 млн. манет. «Агростартап» программа шаерамы 2019 арысен ужа. 2021 арлэн пумозязь соя 9 ёросъёсын выль фермер огазеяськонъёс усьтӥськозы. Отын 30 пала выль ужан интыос кылдозы.
Грант басьтӥсьёслэн лыдзы йылоз на. 7 куарусёнэ Кун Кенеш элькунлэн 2021 арлы бюджетэз сярысь катэ воштонъёсты юнматӥз. Соосын ватсаса 30 млн манет фермеръёслы грантъёслы висъямын.
Фермерлэн нуналэз праздник кутскиз Зура черкогуртысь культура юртын. Элькун парламентлэн спикерезлэн Владимир Невоструевлэн но вань депутатъёслэн нимынызы гуртоосты ӟечкылаз Кун Кенешысь «Единая Россия» фракцилэн кивалтӥсез Елена Дербилова. Ужрадын устоосыз ужасьёс данъетъёсын пусъемын. Элькунысь крестьян но фермер огазеяськонъёслэн, кооперативъёслэн но нимаз возёсъёслэн партнёрствозылэн кивалтӥсезлы Михаил Лебедевлы «Россиысь МЧС-лы 30 ар» медаль сётэмын. «Россиысь дано фермер» нимен сӥлы каремын Эгра ёросысь Мувыр гуртэз выльысь улӟытэм Александр Корепанов. 1980-тӥ аръёсы быдтылэм гуртаз со фермер огазеяськон кылдытӥз, 2008 арын 16 толсуре Кун Кенешлэн пуктэтэныз Эгра ёросысь Мувыр гурт выльысь пусъемын вал. Туннэ отын 10-лэсь ятыр коркаосын уло.
Удмуртиысь фермер движенилэн 30 ар тырмонэзлы сӥзем медален пусъемын Можга ёросысь крестьян возёслэн кивалтӥсез Галина Белозёрова.