Удмуртиысь Кун Кенеш Росси Кивалтэтлэн Тӧроезлы шаерысь гуртоослы юрттэт сётыны курыса вазиськон дасялоз

Туннэ Кун Кенешлэн Тӧроез Владимир Невоструев видеоконференция амалэн Президиумлэн ёзчиосыныз кенешон ортчытӥз. Вераськон мынӥз ю нянь утялтон ужъёслэн мынэмзы но агропром огъетын кылдэм югдур сярысь. Кенешонэ пыриськиз Элькун Кивалтэтлэн Тӧроезлэн воштӥсез, гурт возёсъя но сиён-юонъя министр Ольга Абрамова. 16 гудырикошконлы элькунамы 86% ю нянь утялтон ужъёс быдэстэмын (2020 арын та нуналлы 33% процентэз бусыос бушатэмын вал). Гуртоос 232,1 сюрс гектар вылысь 394,8 сюрс т ю тысь октӥзы. Котькуд гектарысь со шорлыдын 16,9 ц усе. Элькунамы кӧс куазен сэрен ялэм шимъюгдур азьланьтӥське.
«Куд-ог муниципал кылдытэтъёс аран-кутсан ужъёссэс йылпумъязы ини. Соос пӧлын Алнаш но Можга ёросъёс. Можга ёросысь гуртоос туэ 42 сюрс т ю тысь кутсазы. Кылем арын со 70 сюрс т люкаськиз вал», - пусйиз Ольга Абрамова. Солэн верамезъя, туэ элькунмылы ватсаса 519 сюрс тонна тысь шедьтыны кулэ луоз.
Россиысь унояз улосъёсын югдур озьы ик капчи ӧвӧл. Башкириын азьвыл арын сярысь кык поллы ӧжытгес тысь басьтӥзы, няньзы тырмыт уз луы Оренбург улосын но Татарстанын, шуиз кивалтӥсь. Со ивортӥз, Росси Кивалтэтэ Удмуртилэн Тӧроезлэн кинюртэменыз юрттэт курыса гожтэт келямын шуыса. Со сяна, Россиысь гурт ужъёсъя Министерствоен Удмуртие ю тысез чугун сюрес вылтӥ дунтэк ваён пумысен кенешонъёс мынэ. Али гуртоослы кидыс дасяны юрттэт кулэ, шуиз Ольга Абрамова.
Кун Кенешлэн Тӧроез Владимир Невоструев элькунысь гурт возёсъя но сиён-юонъя Министерстволэсь ӵектонъёссэ умоен лыдъяз. «Туэ котыр улосъёсын нянь ӧвӧл, сое кыдёкысь – Сибирьысь, Краснодар улосвылысь нуллоно луоз. Соин ик чугун сюрес дунъёсты берыктон туж кулэ», - пусйиз спикер.
Кун Кенешлэн 7 куарусёнэ ортчоно сессиезлэн ужанрадаз агропром огъетлы юрттэт сётон сярысь ужпумез пыртыны, Росси Кивалтэтлэн Тӧроезлы вазиськон кутыны кенешемын. Элькун парламентысь агропром огъетъя комиссиез гурт возёсъя Министерствоен ӵош гурт ваньбур поттӥсьёслы юрттэт сётонъя ужрадъёс дасяны куризы.