Удмуртиын ватсаса гурт ярмаркаос усьтӥсько

Шаерамы будэтэм бакча сиёнъёсын вузкарон радъяськиз кылем шутэтскон нуналъёсы «ГуртFEST» ужрадын. Гурт культуралы сӥзем праздник «Лудорвай» музей-заповедникын ортчиз.
Удмуртия туннэ бакча емышъёсын ассэ ачиз быдэсак сюдыны быгатэ, шуиз Кун Кенешысь агропром огъетъя, музъем кусыпъёсъя, инкуазез уже кутонъя но сое утёнъя ялан ужась ӧрилэн кивалтӥсез Владимир Варламов. Но дунъёс чутрак медаз ӝутӥське шуыса, вузпӧрын вожвылъяськон луыны кулэ, пусйиз со. «Асьмелэн ярмаркаослы висъям интыосмы вань. Но туннэ соос 70 процентэз гинэ уже кутӥсько. Соин ик каръёслэн кивалтӥсьёссылы тросгес реклама сётон, фермеръёсты каръёсы вузкарыны кыскон сярысь сюлмаськоно», - лыдъя депутат. Со дыре ик, гурт продукциез дунтэмен басьтыса, сое дуногес вузась оптовикъёс шоры саклык висъяно.
Со дыре Удмуртиын тужгес кулэ луись бакча сиёнъёслы дунъёс лэзиськыны кутскизы. Со адӟыны луиз Лудорвайын но.
Тодады вайытом, 19 пӧсьтолэзе Росси Кивалтэт улосъёслэн тӧроосынызы, вузкарисьёсын но гурт ваньбур поттӥсьёсын кенешон ортчытӥз. Отын куд-ог емышъёслы дунъёсты 2 арня ӵоже уськытонъя ӵектонъёс чузъяськизы. Кенешонлэн йылпумъянъёсызъя, Удмуртилэн Тӧроез Александр Бречалов вузкаронниосысь дунъёсты чакласа возьыны, гурт ваньбурен вузкаронъя ярмаркаослэсь лыдзэс будэтыны куриз.