Ижкарын «Локомотив» стадионэз выльдон ужъёслэн нырысетӥ люкетсы йылпумъяське

Кун Кенешысь ужъя, мерлыко политикая но ветеранъёслэн ужъёссыя ялан ужась ӧрилэн кивалтӥсез Алексей Чернов 5 гудырикошконэ Удмурт Элькунысь паралимпи но сурдлимпи спорт амалъёсъя школае вуылӥз. Со ужъюртлэн кивалтӥсьёсыныз тодматскиз, «Локомотив» стдаионэз выльдон но сое сӧсыръёслы тупамон карон ужъёслэн мынэменызы тодматскиз.
Тупатъянлэн нырысетӥ люкетэз йылпумъяськыны кулэ та арня пумын. Та дырлы футболэн шудон бусылэн но бызьылон сюресъёслэн шобретсы выльдэмын, могӟетъёсын бызьылон сюрес лэсьтэмын, администраци юрт тупатъямын. Ужлэн кыкетӥ люкетаз кык спорт площадка, 500 интылы трибунаос, хоккей коробка, стадионэз югдытон сӧзнэт лэсьтыны чакламын. Куинетӥ люкетаз шудонъёслы огъя площадка усьтӥськоз. Озьы Ижкарысь Ленин ёросын пӧртэм луонлыкъёсын адямиослы чаклам спортъя туала выль огъет кылддоз.
Паралимпи но сурдлимпи спорт амалъёсъя школалэн кивалтӥсез Александра Семёнова верамъя, выльдӥськон йылпумъяськем бере «Локомотив» центрын эктонъёсъя, фитнесъя, ЛФК-я но йогая, футболъя занятиос, толалтэ конькиен нискыланъёс радъяськозы. «Доступная среда» программа улсын татын озьы ик ужаны кутскоз тренажёр зал, отчы тазалык ласянь сюбеггес быгатонлыкъёсын адямиос но ветлыны быгатозы. Со сяна, али огъетэ пандусъёсын пыран-потан лэсьтӥське.
Алексей Чернов ужъёслы умой дунъет сётӥз. Выль стадион сосыръёслы но ветлыны шугъяськись адямиослы паськытгес луонлыкъёс кылдытоз, спортэн эшъяськыны, улон ӟечлыксэс ӝутыны юрттоз, пусийз депутат.