Удмуртиын «Таза лу» улосвыл ӵектос ужаны кутске

Удмуртиын «Единая Россия» партилэн «Таза лу» нимам улосвыл ӵектосэз ужаны кутске. Со чакламын коронавирус черен висем муртъёслэсь тазалыксэс юнматонлы. Ӵектос сярысь туннэ Элькун Тӧро дорын ортчем аппарат кенешонын ивортӥз Кун Кенешлэн Тӧроезлэн Нырысетӥ воштӥсез, тазалыкез утёнъя, демографи но семья политикая ялан ужась ӧрилэн кивалтӥсез Надежда Михайлова.
«Ковид адямиез адямиез лябӟытэ, йӧнамез бере но солы таза улон-вылонэ выжыны капчи ӧвӧл. Ӵектос улсын Удмуртиын тазалыклы сӥзем форумъёс радъяны чакламын», - ивортӥз Михайлова. Элькунамы улӥсьёс тазалыксэс эскерыны, шаерысьтымы эмъяськонниосысь ӧнерчиосын кенешыны быгатозы.
Нырысетӥзэ форумез 17 южтолэзе Эгралан ортчытыны чакламын. Культурая но спортъя «Нефтяник» дворецын лекциос, мастер-классъёс ортчозы. Озьы ик отын усьтӥськоз тазалыко урам. Форуме пыриськисьёс сюбег удысъёсъя эмчиослэсь консультациос басьтыны быгатозы. Ужалозы кардиолог, онколог, офтальмолог, гинеколог но мукет врачъёс. Радъямын луозы тазалыко сиськонъя но шуак шуге-леке вуэм адямилы нырысь юрттэт сётонъя школаос.
Эм удысын тыршисьёс понна котрес ӝӧк сьӧрын кенешон радъямын луоз. Валтӥсез сэрттоно-пертчоно ужпум – коронавирусэн висёнэз алон, висисьёсын ужась эмчиослы юрттон.
«Таза лу» форумлэн йылпумъясь ужрадэз – кырын гимнастика лэсьтон. Сое ортчытоз улосчимы, тодмо биатлонист, дуннелэн кык пол чемпионэз, Олимпи шудонъёслэн призёрзы, Кун Кенешысь физкультурая, спортъя но егитъёсын ужанъя ӧриен кивалтӥсь Иван Черезов.
Форумъёс шаерамы ортчылозы ар пумозь котькуд арнялы быдэ. Удмуртилэн Тӧроез Александр Бречалов кичӧлтонлы дурбасьтӥз но пусйиз - та проект эмудысын тыршисьёсты но элькунысь азьветлӥсьёсты висёнэн нюръяськонын огазеясь быдэс сӧзнэтлы пӧрмыны быгатоз.
Тодады вайытом, Удмурт Элькун «Демография» йӧскалык ӵектослэн «Укрепление общественного здоровья» проектэзлэн «пилот» улосвылъёсыз пӧлы пыриз. Соин калыклэсь тазалыксэ утёнъя центръёс кылдытыны но тазалыко улонъя валэктон уж радъяны чакламын.