Удмуртилэн Тӧроез Владимир Красильниковлы но Юрий Сухановлы Элькунлэн Дано кунмуртъёсызлэсь нимысьтыз лентаоссэ сётӥз

Туннэ Кун Кенешлэн сессияз Элькунлэн Тӧроез Александр Бречалов Удмуртилэн Дано кунмуртэзлэсь тодметпусъёссэ – нимысьтыз лентаоссэ – сётӥз та дано нимен пусъем улосчиосмылы – Удмуртиысь Вылӥ судлэн азьвыл тӧроезлы Юрий Сухановлы но Кун Кенешысь депутатлы Владимир Красильниковлы.
Владимир Красильников 40 арлэсь кема ини Вавож ёросысь «Колос» гурт возёсэн кивалтэ. Туннэ та предприятие шаерамы но, быдэс Россиын но азьмынӥсьёсыз пӧлын. 2020 арын 1712 йырлы гид, шаерамы нырысетӥез пудо сиён лэсьтон центр усьтэмын.
Арысь аре ваньбур поттонэз йылэтэм сяна, хозяйство гуртысь мерлыко удысэз азинтонлы бадӟым саклык висъя. Солэн кужыменыз культурая но тазалыкез юнматонъя центръёс, нылпи сад но мукет мерлыко ужъюртъёс лэсьтэмын. Туэ куасэн бызьылонъя база но югдытэм сюрес усьтӥськизы. «Тыршемез тазьы сӥлы каремзы азьланяз но ужаны мылкыдэз ӝутэ», - шуиз Элькунлэн дано кунмуртэз Владимир Красильников.
Юрий Суханов суд сӧзнэтын 1984 арысен тырше. 1988 арын Удмурт Элькунысь Вылӥ судын ужаны кутскиз, 1996 арын солэн тӧроез луиз. Ужаны кутскем дырысеныз Юрий Суханов ассэ вылӥ быгатонлыко ӧнерчиен возьматӥз. Али шутэтске ке но ини, солэн ужам сюресэз егитъёслы адӟем карымон луэ.