Андрей Исаев Удмуртиын улӥсьёс понна видеоконференция амалэн приём ортчытӥз

Туннэ, «Единая Россия» партилэн вордӥськем нуналаз, Кун Думаысь «Единая Россия» фракцилэн кивалтӥсезлэн Нырысетӥ воштӥсез Андрей Исаев Удмуртиын улӥсьёс понна видеоконференция амалэн приём ортчытӥз. Бырйисьёс пӧртэм юанъёсын вазиськизы. «Котьку сямен вал улон инты висъянэн герӟаськем ужпумъёс, чузъяськиз спорт школаослы юрттэт сётон сярысь лэчыт юан», - вераз депутат. Солэн кылъёсызъя, йӧскалык проект улсын Удмуртилы федерал бюджетысь ватсаса шӧдскымон юрттэт висъяськоз ӵапак спортъя инфраструктураез азинтонлы. 2020 арын спорт объектъёслы субсидиослэн быдӟалазы 16 млн. манет котыр вал ке, 2021 арын 46,5 млн. манет висъяны чакламын. Спорт тӥрлык но инвентарь басьтыны 2020 арын озьы ик 16 млн. манет висъяськиз. 2021 арын та субсидиос ог поллы йылэтэмын луозы но 31 млн. манетозь вуозы. 22 млн. манетысь 177 млн. манетозь будоз спорт объектъёсты лэсьтыны но выльдыны чаклам субсидиослэн быдӟалазы. Табере та ужпумъёслы элькун бюджетысь но коньдон шедьтыны кулэ, пусйиз Исаев. Приёме гожтӥськем Борис Кропачев уно адямиосты сюлмаськытӥсь ужпумез сэрттыны-пертчыны юрттӥз. «Нырысетӥзэ со мон доры приёме кӧня ке ар талэсь азьло вуылӥз, - вераз Андрей Исаев. - Соку ивортӥз, опекун луэменыз, пенсиезлы индексацизэ ыштӥз шуыса». Зэм но, опекунъёс пиналэз воземзы понна коньдон басьто, со уждун шуыса лыдъяське. Соин ик опекунъёслэн пенсизылы, ужамысь дугдытозязы, индексация ӧз ортчытъяськы. «Ми та югдурез шонертэмен лыдъям, - ивортӥз депутат. - Угось, мурт нылпиез быдэтыса, адями вылаз кунлэсь ужоскетъёссэ басьтэ. Соин ик кун солы юрттӥськыны кулэ. Вылаз ик опекунъёслы тыронъёслэн быдӟалазы Удмуртиын пичи. Соин ик ми Кун Думае та тырмымтэез палэнтонъя катӵектос сётӥм. Азьмурт со понна дурбасьтӥз. Закон кутэмын. Табере опекун пенсионеръёслэн индексацилы эрикрадзы кылдӥз».