Удмуртиын катэн 14 праздник но 19 дано нунал юнматэмын

Туннэ Кун Кенешлэн кызь укмысэтӥ сессияз быдэсак кутэмын «Удмурт Элькунлэн праздник но дано нуналъёсыз сярысь» кат. Со шаерамы 19 дано но 14 праздник нуналъёсты юнматӥз.
Удмурт кыллэн нуналэз азьын (27 шуркынмонэ) тодосъя, дышетонъя, культурая, йӧскалык но егитъёсын ужан политикая но спортъя комиссилэн кивалтӥсез Татьяна Ишматова катӵектосэ пыртыны вуэм ватсанъёс сярысь ивортонзэ быдэсак удмурт кылын лэсьтӥз. Ӟуч кылын докладэз лыдӟыны луиз экран вылысь.
Депутатъёс дурбасьтӥзы праздник нуналъёс пӧлы йӧскалык печатьлэсь нуналзэ пыртыны. Со – 4 тулыспал. Со нуналэ удмурт кылын нырысетӥез «Войнаысь ивор» газет потыны кутске. Туннэ со «Удмурт дунне» нимын печатлаське.
Умоен лыдъямын буре ваён нуналъёс пӧлы ньыль удмурт азьветлӥсьёслэсь вордӥськем нуналъёссэс пыртыны. Со:
- 29 толшор – удмурт гожъясьлэн, кылбурчилэн, югдытӥсьлэн, кылысь кылэ берыктӥсьлэн Максим Прокопьевич Прокопьевлэн вордӥськем нуналыз;
- 11 гудырикошкон – ыбылӥськон пыӵал-тӥрлык кылдытӥсь конструкторлэн, техника тодосъя докторлэн Геннадий Николаевич Никоновлэн вордӥськем нуналыз;
- 18 гудырикошкон – тодмо крезьгурчилэн, удмурт крезьгур искусстволы инъет кылдытӥсьлэн Геннадий Михайлович Корепанов-Камскийлэн вордӥськем нуналыз;
- 17 куарусён – нылкышно кавалеристлэн, Ӟуч императорской армилэн офицерезлэн, 1812 арын Атыкай оже пыриськем Надежда Андреевна Дуровалэн вордӥськем нуналыз;
- 18 куарусён – кун ужасьлэн, РСФСР-лэн калык комиссарезлэн Иосиф Алексеевич Наговицынлэн вордӥськем нуналыз.
Кат кужымаз пыроз сое нимлыко шараям бере 10 нунал ортчыса.