Удмурт Элькунлэн 2021 но вуоно 2022 но 2023 аръёслы бюджетэз сярысь катӵектос нырысетӥ лыдземен юнматэмын
24.11.2020
Туннэ Кун Кенешлэн кызь укмысэтӥ сессияз депутатъёс нырысетӥ лыдӟемен юнматӥзы элькунлэсь 2021 но вуоно 2022 но 2023 аръёслы бюджетэз сярысь катӵектосэз.
Ужкагаз элькун парламентэ 30 коньывуонэ лэземын вал, 2 шуркынмонэ сое эскерыны кутӥзы. Ӵектосэз вань комиссиослэн кенешонъёсазы но шара лыдӟонъёсын сэрттӥзы-пертчизы. Бюджетлэсь ӵектоссэ сессиын эскерон азьын депутатъёс элькунэз мерлык но экономика удысъёсъя азинтон прогнозэн тодматскизы.
Коньдэтлэн проектэз сярысь ивортон лэсьтӥз коньдон ужпумъёсъя министрлэсь ужзэ быдэсъясь Вера Сухих. Солэн верамезъя, коньдэтэз кылдытыку, нырысь интые пуктӥськиз мерлыко ужпумъёсты быдэстон.
2021 арлы табышъёслэн быдӟалазы 65 млрд. 935 млн. манет чакламын. Со пӧлысь 51 млрд. 415 млн. манетэз – вытъёсъя тыронъёс. Федерал юрттэтлэн быдӟалаез 14 млрд. 520 млн. манет пусъемын. Кыкетӥ лыдӟонлы та юрттэтлэн быдӟалаез йылыны кулэ, валэктӥз Вера Сухих.
Уже кутыны вуоно арын 65 млрд. 959 млн. манетэз чакламын. 71 процентэз уксё мерлыко ужпумъёслы мыноз. Тужгес но трос коньдон кулэ луоз уждун тыронлы. Та мугъёслы бюджетысь 26 млрд. 243 млн. манет яке 40 процентэз уксё кошкоз. Эшшо 15 процентэз яке 9 млрд. 645 млн. манет мерлыко юрттӥськетъёслы кутӥськоз. 7 млрд. 190 млн. манет мыноз ужасьтэм калыклы эмстрахованилы.
Бюджетын экономикалэн куд-ог удысъёсызлы но юрттэт чакламын. Озьы сюресъёсъя фондлэн быдӟалаез 7 млрд. 232 млн манет пусъемын. Агропром огъетлы 1 млрд. 946 млн. манет учкемын, со пӧлысь 1 млрд. 55 млн. манетэз – федерал юрттэт.
Азьвыл сямен ик, бюджетысь уксё программаосъя люкылӥськоз. Огъя вераса, шаерамы та дыре 29 программа быдэсъяське. «Развитие образования» кун программалы 21 млрд. 493,7 млн манет висъяськоз. Мерлыко ужпумъёслы чаклам вань коньдонлэн со 46 процентэз. Бадӟым люкетэз уксё мыноз уждунлы. Элькун коньдэт чотын уждун тыриське нылпи садъёсысь воспитательёслы но школаосысь дышетӥсьёслы. Со 31 сюрс адями.
Тазалыкез азинтонъя программалы кайта 11 млрд 612,3 млн. манет чакламын. Со пӧлысь 1 млрд. 397,5 млн манетэз – федерал уксё. Калыклы мерлыко утет сётон программалы 9 млрд 992,5 млн. манет учкемын.
25 млрд. 787 млн. манет чакламын интыосысь бюджетъёслы юрттэтлы. Кызьы пусйиз Кун Кенешысь бюджетъя, вытъёсъя но коньдон ужпумъёсъя ӧрилэн кивалтӥсез Юрий Тюрин, ӵектос шаерамы пандемиен сэрен кылдэм югдурез возьматэ. 2021-2023 аръёсы экономикаез азинтыны шуг луоз, вераськон мыноз сое ӝутон сярысь. Соин ик федерал юрттэтлэн кулэлыкез та дыре уката но бадӟым, шуиз депутат.
Сессия азьын вераськыкуз, Элькунлэн Тӧроез Александр Бречалов пусйиз, вуоно арлы бюджетлэн ӵектосэз – одӥгез тужгес секытэз. Солэн мугъёсыз – быдэс дуннеысь экономика но эпидемиология ласянь шуг югдур. «Туэ табышъёс но уже кутэм уксёлэн пӧртэмлыкез котькулэсь но бадӟым – 28-30 миллиард манет. Юрттэ Федерация. Али нош ик отысь дотация возьмаськом. Та секыт вакытэз ортчем потэ ини. Но асьмелы аналтӥськоно ӧвӧл, шуг ке но, луонлык шедьтоно азинскон понна», - шуиз Александр Бречалов.
Кун Кенешысь депутатъёс бюджетлэсь ӵектоссэ нырысетӥ лыдӟемен юнматӥзы. Отчы ватсанъёс ӵектыны 2 толсурозь дыр сётэмын. 15 толсуре, кызь укмысэтӥ сессилэн кыкетӥ кенешоназ, катӵектос кыкетӥ лыдӟемен эскеремын луоз.
Ужкагаз элькун парламентэ 30 коньывуонэ лэземын вал, 2 шуркынмонэ сое эскерыны кутӥзы. Ӵектосэз вань комиссиослэн кенешонъёсазы но шара лыдӟонъёсын сэрттӥзы-пертчизы. Бюджетлэсь ӵектоссэ сессиын эскерон азьын депутатъёс элькунэз мерлык но экономика удысъёсъя азинтон прогнозэн тодматскизы.
Коньдэтлэн проектэз сярысь ивортон лэсьтӥз коньдон ужпумъёсъя министрлэсь ужзэ быдэсъясь Вера Сухих. Солэн верамезъя, коньдэтэз кылдытыку, нырысь интые пуктӥськиз мерлыко ужпумъёсты быдэстон.
2021 арлы табышъёслэн быдӟалазы 65 млрд. 935 млн. манет чакламын. Со пӧлысь 51 млрд. 415 млн. манетэз – вытъёсъя тыронъёс. Федерал юрттэтлэн быдӟалаез 14 млрд. 520 млн. манет пусъемын. Кыкетӥ лыдӟонлы та юрттэтлэн быдӟалаез йылыны кулэ, валэктӥз Вера Сухих.
Уже кутыны вуоно арын 65 млрд. 959 млн. манетэз чакламын. 71 процентэз уксё мерлыко ужпумъёслы мыноз. Тужгес но трос коньдон кулэ луоз уждун тыронлы. Та мугъёслы бюджетысь 26 млрд. 243 млн. манет яке 40 процентэз уксё кошкоз. Эшшо 15 процентэз яке 9 млрд. 645 млн. манет мерлыко юрттӥськетъёслы кутӥськоз. 7 млрд. 190 млн. манет мыноз ужасьтэм калыклы эмстрахованилы.
Бюджетын экономикалэн куд-ог удысъёсызлы но юрттэт чакламын. Озьы сюресъёсъя фондлэн быдӟалаез 7 млрд. 232 млн манет пусъемын. Агропром огъетлы 1 млрд. 946 млн. манет учкемын, со пӧлысь 1 млрд. 55 млн. манетэз – федерал юрттэт.
Азьвыл сямен ик, бюджетысь уксё программаосъя люкылӥськоз. Огъя вераса, шаерамы та дыре 29 программа быдэсъяське. «Развитие образования» кун программалы 21 млрд. 493,7 млн манет висъяськоз. Мерлыко ужпумъёслы чаклам вань коньдонлэн со 46 процентэз. Бадӟым люкетэз уксё мыноз уждунлы. Элькун коньдэт чотын уждун тыриське нылпи садъёсысь воспитательёслы но школаосысь дышетӥсьёслы. Со 31 сюрс адями.
Тазалыкез азинтонъя программалы кайта 11 млрд 612,3 млн. манет чакламын. Со пӧлысь 1 млрд. 397,5 млн манетэз – федерал уксё. Калыклы мерлыко утет сётон программалы 9 млрд 992,5 млн. манет учкемын.
25 млрд. 787 млн. манет чакламын интыосысь бюджетъёслы юрттэтлы. Кызьы пусйиз Кун Кенешысь бюджетъя, вытъёсъя но коньдон ужпумъёсъя ӧрилэн кивалтӥсез Юрий Тюрин, ӵектос шаерамы пандемиен сэрен кылдэм югдурез возьматэ. 2021-2023 аръёсы экономикаез азинтыны шуг луоз, вераськон мыноз сое ӝутон сярысь. Соин ик федерал юрттэтлэн кулэлыкез та дыре уката но бадӟым, шуиз депутат.
Сессия азьын вераськыкуз, Элькунлэн Тӧроез Александр Бречалов пусйиз, вуоно арлы бюджетлэн ӵектосэз – одӥгез тужгес секытэз. Солэн мугъёсыз – быдэс дуннеысь экономика но эпидемиология ласянь шуг югдур. «Туэ табышъёс но уже кутэм уксёлэн пӧртэмлыкез котькулэсь но бадӟым – 28-30 миллиард манет. Юрттэ Федерация. Али нош ик отысь дотация возьмаськом. Та секыт вакытэз ортчем потэ ини. Но асьмелы аналтӥськоно ӧвӧл, шуг ке но, луонлык шедьтоно азинскон понна», - шуиз Александр Бречалов.
Кун Кенешысь депутатъёс бюджетлэсь ӵектоссэ нырысетӥ лыдӟемен юнматӥзы. Отчы ватсанъёс ӵектыны 2 толсурозь дыр сётэмын. 15 толсуре, кызь укмысэтӥ сессилэн кыкетӥ кенешоназ, катӵектос кыкетӥ лыдӟемен эскеремын луоз.