Владимир Невоструев Кун Кенешын оптимизация ортчытыса шыръям коньдонэз пинал вордыны дасяськись нылкышноослы юрттэтлы кутыны ӵектӥз

Туннэ Кун Кенешлэн азьвыл чакламтэ кызь витетӥ сессияз депутатъёс элькун парламентлэсь сӧзнэтсэ воштон сярысь пуктэт юнматӥзы. Соя ялан ужась ӧриослэн лыдзы тямыс интые сизьым кельтэмын. Кунэз лэсьтонъя но интыысь аскивалтонъя но Регламентъя, Кун Кенешлэсь ужзэ радъянъя но кышкыттэмлыкъя комиссиослэсь ужзэс табере выль – кунэз лэсьтонъя, интыысь аскивалтонъя но кышкыттэмлыкъя – ӧри нуоз.
Кун Кенешлэн Тӧроез Владимир Невоструев верамъя, ужрад бюджетысь коньдонэз шыръяны юрттоз, нош ужлэсь ӟечлыксэ уз уськыты. Выль комиссиен Кун Кенешлэн Тӧроезлэн воштӥсез кивалтоз.
«Туэ ини оптимизаци ужрадъёс чотын Кун Кенеш вить миллион манет пала коньдонэз шыръялоз, - шуиз Владимир Невоструев. – Со уксёез пинал вордыны дасяськись нылкышноослы юрттэтлы келяны дэмласько. Вуоно анайёс туннэ нокыӵе федерал юрттӥськетъёс улэ уг сюро. Но шаерамы асьмеос соослы пинал будэтӥсь семьяослы сямен ик юрттэт чакланы быгатӥськом».
Та пуктэтэн ик тазалыкез утёнъя, демографи но семья политикая ялан ужась ӧриен Кун Кенешлэн Тӧроезлэн Нырысетӥ воштӥсез кивалтоз шуыса пусъемын.