Кун Кенешлэн Президиумезлэн ёзчиосыз Быдӟым Атыкай ожын Вормонлэн 75 ар тырмонэзлы дасяськон ужпумъёсты эскеризы

Туннэ Кун Кенешлэн Президиумезлэн кенешонэз ортчиз. Кун Кенешлэн Тӧроез Владимир Невоструев сое дистанционной амалэн нуиз. Депутатъёс Быдӟым Атыкай ожын Вормонлэн 75 ар тырмонэзлы дасяськон ужпумъёсты эскеризы. Вераськонэ пыриськизы Удмуртиысь Тӧролэн но Кивалтэтлэн Администрациенызы кивалтӥсь Сергей Смирнов, элькунысь министерствоослэн но ведомствоослэн кивалтӥсьёссы.
Сергей Смирнов тодэ вайытӥз, эпидемиология ласянь секыт югдурен, Вормонлэн юбилеезлы сӥзем вань калыко ужрадъёс берлолы выжтэмын. Бадӟым люкетэз чаклам ужрадъёс онлайн амалэн ортчозы. Соос сярысь ивортонъёсты шедьтыны луоз http://udm9may.ru сайтысь, вераз Смирнов.
Ужъя но мерлыко политикая министр Татьяна Чуракова ожысь ветеранъёслы но сӧсыръёслы чаклам юрттӥськетъёс сярысь ивортӥз. Физкультурая, спортъя но егитъёсын ужан политикая министрлэн воштӥсез Дмитрий Плешаков пиналъёслы патриотизм мылкыд пыӵатонъя ужлэн мынэмез сярысь вераз. Архив ужъёсъя Комитетлэн кивалтӥсез Наталья Тойкина Быдӟым Атыкай ожен герӟаськем архив материалъёсты утён ужпумъёслэн быдэсъяськемзы, адямиослы фронтэ кошкем ӵыжы-выжыоссы сярысь ивортонъёсты утчаны юрттэт сётон сярысь мадиз. Элькунамы та дыре «Фронтовики Удмуртии» интернет-проект ужа. Отысь 103 ветеранъёслэн ожмаськон сюрессы сярысь ужкагазъёсты шедьтыны луэ.
Округъёсын ужлэн мынэмез сярысь ивортӥзы Кун Кенешысь ялан ужась ӧриослэн но депутат фракциослэн кивалтӥсьёссы.
«КПРФ» фракцилэн кивалтӥсез Алексей Конорюков Быдӟым Атыкай ожен герӟаськем синпелетъёсты выльдонлэн мынэмез сярысь вераз. Шаерамы та дыре 968 сыӵе буре ваён интыос лыдъясько, 33-ез со – ожгарчиосты ватэм интыос. 693-зэ синпелетъёсты тупатъяны чакламын. Алексей Конорюковлэн верамезъя, Быдӟым Атыкай оже пыриськемъёслы сӥзем синпелетъёсты выльдон-тупатъян уж туэ шаерамы нырысьсэ таӵе паськыт радъямын. Элькун Тӧролэн Александр Бречаловлэн кичӧлтэмезъя, солы элькун бюджетын нимысьтыз коньдон висъямын. Озьы ик юрттэт сёто предприятиос но огазеяськонъёс. Депутат та ужез арлы быдэ ортчытъяны, ӟеч сямлы пӧрмытыны ӵектэ.
«ЛДПР» фракцилэн кивалтӥсез Тимур Ягафаров пусйиз, висъяськыса улон режим йылпумъяськем бере, фракциысь депутатъёс геройёслы сӥзем акциос но ужрадъёс ортчытъялозы, гуртъёсын улӥсьёслы концертъёс, ӵошатсконъёс но Вормонлэн юбилеезлы сӥзем конкурсъёс радъялозы. Со сяна, Тимур Ягафаров Можга карын фронтэ ветлэмъёслы выль синпелет пуктыны кичӧлтонэн вазиськиз.
«Справедливая Россия» фракцилэн кивалтӥсез Фарид Юнусов вераз, партилэн улосысь ёзэтэз историез утёнъя бадӟым уж нуэ. Самоизоляция вакытэ Вормон, оже пыриськем муртъёс но соослэн семьяоссы сярысь печатлам, аудио но видеоматериалъёс поттӥсько.
«Единая Россия» фракцилэн кивалтӥсез Елена Дербилова пусйиз, фракцилэн ёзчиосыз «Старшее поколение» проектэз быдэсъянэ пырисько шуыса. Со улсын ожысь но ужысь ветеранъёслы юрттэт сётӥське. Со сяна, 2019 арысен Удмуртиын «Дорогой памяти к Победе» ӵектос ужа, нош туэ Кун Кенеш «Сохраняя память» акция ялӥз. Отын депутатъёс асьсэлэн ӵыжы-выжыоссылэн ож аръёсы лэсьтэм ужъёссы сярысь верало.
Наукая, дышетонъя, культурая, йӧскалык но егитъёсын ужан политикая но спортъя ялан ужась комиссилэн кивалтӥсез Татьяна Ишматова пусйиз, туннэ историлэсь зэмлыксэ утён ужпумлы бадӟым саклык висъяно шуыса. Со понна будӥсь пиналъёсын ужано. Татын мерлыко огазеяськонъёслэн туж бадзым интызы но кужымзы, вераз депутат.
«9 Май – вань арлыдо муртъёсты огазеясь праздник, - шуиз Кун Кенешлэн Тӧроез Владимир Невоструев. - Туэ югдур аспӧртэм ке но, Вормон нуналлэсь данзэ со уг бездыты. Асьмеос ваньзэ лэсьтыны кулэ, ветеранъёс асьмелэсь гажаммес, соосты дунъяммес мед шӧдозы шуыса».
Владимир Невоструев депутатъёслы Вормон нуналлэн 75 ар тырмонэзлы сӥзем ужрадъёсы мыло-кыдо пыриськыны ӧтьыса вазиськиз.