Нырысетӥ лыдӟемен юнматэмын музей уж сярысь элькун кат

Кун Кенешлэн 17-тӥ сессияз нырысетӥ лыдӟемен юнматэмын музей уж сярысь катӵектос. Али шаерамы 32 кун но муниципал музейёс но соослэн 8 филиалъёссы ужало. Озьы ик 140 пала кун луисьтэм музейёс пусъемын. Соос 740 сюрс пӧртэм арбериосты но кагазъёсты утьыса возё. 75 процентэз музейёс шаертодон удысэн но историен герӟаськемын. Арлы быдэ та ужъюртъёсы ветлӥсьёслэн лыдзы йылэ. Но татчыозь музейёслэн асьсэлэн нимысьтыз законзы ӧй вал. Соослэн ужзы 1996-тӥ арын кутэм федерал катъя радъяськиз.
«Выль кат уно валантэмъёс палэнтыны, удыслы ӝог азинскыны юрттоз», - шуэ наукая, дышетонъя, культурая, егитъёсын ужан но йӧскалык политикая но спортъя ялан ужась комиссилэн кивалтисез Татьяна Ишматова. Озьы, шаерысьтымы 5 ёросъёсын муниципал музейёссы али ӧвӧл, ляб азинтӥське нимаз муртъёсын музейёс кылдытон.
8-тӥ шуркынмонозь комиссие катэ пыртыны ӵектонъёсты возьмало. Чакламъя, катӵектосэз быдэсак юнматозы Кун Кенешлэн 18-тӥ сессияз.