Эскеризы мылкыд каремъя ужанэз азинтон ужпумъёсты

Кун Кенешысь наукая, дышетонъя, культурая, йӧскалык но егитъёсын ужан политикая но спортъя ялан ужась ӧрилэн кивалтӥсез Татьяна Ишматова ас мылкыд каремъя ужанэз (волонтёрствоез) азинтонъя элькун катӵектосэз дасясь группалэсь кенешонзэ ортчытӥз.
Вераськонэ пыриськизы физкультурая, спортъя но егитъёсын ужан политикая министерствоысь, озьы ик культурая, мерлыко политикая но ужъя, тазалыкез утёнъя но коньдон ужпумъёсъя министерствоосысь, Кун Кенешысь, Элькун Тӧролэн но Кивалтэтлэн Администрациысьтызы ӧнерчиос, Ижкарысь Мерлыко палаталэн ёзчиосыз, волонтёр огазеяськонъёслэн кивалтӥсьёссы.
Кызьы пусйиз Татьяна Ишматова, ас мылкыд каремзыя ужась адямиос туннэ бадӟым юрттэт сёто пӧртэм ужрадъёсты ортчытъянын, висисьёсты учко, ветеранъёслы но секыт улон югдуре вуэм муртъёслы юрттӥсько, ышем муртъёсты утчанэ пырисько. Волонтёръёс бадӟым уж нуо. Но туннэ кулэлык кылдэмын со ужез нимысьтыз катэн юнматыны но радъяны. Со волонтёр огазеяськонъёслэсь нимаз адямиосын но тӧрлык ёзъёсын кусыпъёссэс, волонтёръёслэсь эрикрадъёссэс но кылкутонзэс юнматоз, соосты уже кыскыны ӧръёсты пусъёз.
Пумиськонэ пыриськисьёс таӵе катлэн кулэлыкез понна дурбасьтӥзы. Солэсь ӵектоссэ дасян уж азьланьтӥськоз.