Тодон-валанъёслэн нуналазы Кун Кенешысь депутатъёс сӥё-дано линейкаосы пыриськизы

Туннэ, 2-тӥ куарусёнэ, Кун Кенешлэн Тӧроез Алексей Прасолов Сарапулысь 4 школаосы сӥё-дано линейкаосы вуылӥз. Элькун парламентлэн спикерез дышетӥсьёсты, пиналъёсты но анай-атайёсты Тодон-валанъёслэн нуналэнызы ӟечкылаз. Туннэ Сарапулысь 1437 пиналъёс понна школа гырлы нырысетӥзэ жингыртӥз. Огъя карысь школаосы 11700 дышетскисьёс лыктӥзы. 2018-тӥ арен ӵошатыса, со 500 муртлы тросгес.
Кызьы вераз Сарапул кар администрациысь дышетонъя управленилэн кивалтӥсез Владимир Красноперов, «Образование» йӧскалык проект улсын Сарапулысь 23-тӥ школаын 2020-тӥ арын компьютер класс усьтӥськыны быгатоз. Матысь 5 аръёсы Сарапулын 3 выль школа пуктӥськоз, кванториум лэсьтӥськоз. Озьы ик ватсаса тодон-валан сётонъя эшшо одӥг ужъюрт кылдытыны чакламын.
«Тӥ азьын бадӟым сюрес, со капчи ӧвӧл. Луозы шумпотонъёс но, ӝожомонъёс но. Но котькыӵе ужъёсын тӥ вӧзын - визьмо дышетӥсьёс но анай-атайёс. Сӥзисько вордӥськем Сарапулдылэн, Удмуртимылэн но быдӟым Россилэн зэмос патриотъёсыз мед луоды!» - шуиз Алексей Прасолов, 23-тӥ школаын пиналъёс азьын вераськыкуз.
Школаосысь сӥё-дано линейкаосы пыриськизы Кун Кенешысь уноез депутатъёс но. Кун Кенешлэн Тӧроезлэн воштӥсез, тазалыкез утёнъя, семья но демографи политикая комиссилэн кивалтӥсез Надежда Михайлова кӧня ке школаосысь пиналъёсты ӟечкылаз, соос пӧлын – Столичной микрорайонысь лицей. «Столичный лицей» усьтӥськиз 2017-тӥ арын федерал программая. Туннэ лицее 200 пиналъёс нырысьсэ лыктӥзы.
Кузебай Герд нимо йӧскалык кун гимназиысь дышетӥсьёсты, дышетскисьёсты но соослэсь анай-атайёссэс ӟечкылаз наукая, дышетонъя, культурая, йӧскалык но егитъёсын ужан политикая но спортъя комиссилэн кивалтӥсез Татьяна Ишматова.
Агропром огъетъя, музъем кусыпъёсъя но инкуазез утёнъя комиссилэн кивалтӥсез Владимир Варламов Вотка ёросысь Июльское школаысь сӥё-дано линейкае пыриськиз. Отын туэ 417 пинал тодон-валан басьтоз.
Мукет комиссиослэн но кивалтӥсьёссы асьсэ быръён округъёсысьтызы школаосы вуылӥзы.