Удмуртиын гурт культуралы сӥзем ньылетӥез «ГуртFEST» шулдыръяськон ортчиз

17 гудырикошконэ архитектурая но этнографияя «Лудорвай» музей-заповедникын йылпумъяськиз гурт лулчеберетлы сӥзем «ГуртFEST» фестиваль. Ужрад кык нунал ӵоже кыстӥськиз. 16 гудырикошконэ Сарапулын Эстониысь но Карелиысь усточиослэн концертсы ортчиз. «Лудорвай» музей-заповедникын праздниклы кутскон сётӥз 107 аръем тӧл вукоез лэзён. Со бере валтӥсь сцена вылын Удмуртиысь, Эстониысь, Москваысь, Татарстанысь но Карелиысь фольклор коллективъёс быгатонлыкъёссэс возьматӥзы.
Люкаськемъёсты ӟечкыласа, Кун Кенешысь наукая, дышетонъя, культурая, йӧскалык но егитъёсын ужан политикая но спортъя ялан ужась ӧрилэн кивалтӥсез Татьяна Ишматова пусйиз, та фестиваль пӧртэм выжыысь, пӧртэм арлыдъем но пӧртэм осконъёсын улӥсь адямиосты люка шуыса. «Асьмеды огазея вордӥськем музъеммес но калык культурамес яратон, улонмес чебергес но тунсыкогес карыны тыршон. Бадӟым тау та празднике нылпиосыныды лыктэмды, соослы пӧртэм культураосын но сямъёсын тодматскыны луонлык сётэмды понна», - шуиз со.
Праздникез радъясьёслы но куноослы пумитан кылъёсын вазиськиз Удмурт Элькун Кивалтэтлэн Тӧроезлэн воштӥсез Анастасия Муталенко но.
Фестиваль улсын выль чечыез вӧсян но «Музыка в стиле этно» конкурс ортчиз. Ужаз «кибашлыослэн гуртсы», радъяськизы пӧртэм мастер-классъёс, адзытонъёс, эскскурсиос но шудонъёс.