Алексей Прасолов: Вормон нунал – быдӟым праздник, пӧртэм арлыдо адямиосты Атыкай музъем понна данъяськон мылкыдэн огазеясь нунал

9-тӥ куартолэзе асьмелэн кунмы Быдӟым Атыкай ожын Вормонлы 74 ар тырмонэз пусъе.
Быдӟым Атыкай ож ог 4 ар ӵоже кыстӥськиз. Со – дунне вылысь тужгес бадӟымез ожтӥрлыко нюръяськон. Миллионъёсын адями улонъёсты уретыса, война Россиын улӥсь котькуд семьяе бурмисьтэм яра кельтӥз.
Вормон нуналэн элькунамы улӥсьёсты ӟечкылаз Кун Кенешлэн Тӧроез Алексей Прасолов.
«Быдӟым Вормон – шаермы понна бадӟым нунал. Асьмеос данъяськыса тодамы вайиськомы историмес, песятайёсмылэсь кышкасьтэм луэмзэс, тау кылъёс вераськомы ваньмызлы, кин улонзэ, тазалыксэ ӧз жаля эрикмы понна.
Войналэн вань 1418 нуналъёсыз ӵоже Удмуртиын улӥсьёс ожмаськизы, ужазы. Шаерамы 50-лэсь ятыр промышленной предприятиос интыямын вал. Ижысь заводъёсын ог 11 миллион ож тӥрлык бичазы. Туж секыт аръёсы Ижысен Балезиноозь чугун сюрес лэсьтэмын. Туннэ асьмеос ваньмы ӵош сюлмаськыны кулэ, тодэ ваёнъёс пиналъёсмылы мед кылёзы шуыса.
Туэ асьмеос ожтӥрлык кылдытэм тодмо конструкторлэн Михаил Тимофеевич Калашниковлэн вордӥськемез дырысен 100 ар тырмонэз пусйиськом. Солэн автоматэз юрттӥз но али юрттэ асьме кунмес утьыны.
Нимысьтыз тау карон кылъёсме верасько фронтовикъёслы, концлагерьёсын курадӟытэмъёслы, фронт мышкын ужамъёслы. Тӥ – милям зэмос узырлыкмы но данъяськонмы. Музъемозь йыбырттӥсько Вормон понна!»,- верамын ӟечкыланын.
Вормон нуналэ Алексей Прасолов элькунамы улӥсьёслы юн тазалык, шудбур но сайкыт чагыр инбам сӥзиз.