Йӧскалык ӵектосъёслы коньдон висъямын

Йӧскалык ӵектосъёсты быдэсъян понна, Удмуртиын ватсаса 1 миллиард 300 миллион манетлэсь ятыр коньдон висъямын. Бюджет сярысь катэ та ласянь воштонъёсты юнматӥзы туннэ Кун Кенешлэн сессияз. Кызьы вераз Элькунысь коньдон ужпумъёсъя министрлэсь ужзэ быдэсъясь Вера Сухих, тужгес бадӟым - 800 миллион манет – уксё келямын луоз «Демография» ӵектосэз быдэсъяны. Бадӟым люкетэз уксё кутӥськоз пичи нылпиослы яслиос лэсьтыны. «Тазалыкез утён» йӧскалык проектлы ог 200 миллион манет висъяны чакламын. «Дышетон» йӧскалык проектъя 330 но ӝыны миллион манет висъяськоз. Соин Кезын школа лэсьтӥськоз. Кун Кенешлэн Тӧроезлэн нырысетӥ воштӥсез Владимир Невоструев верамъя, йӧскалык ӵектосъёсты быдэсъян понна элькунлэн бюджетаз воштонъёс азьланяз но луозы на. Соос шаерамы федерал уксёез кыскыны луонлык сётозы. Куронъёсъя, проектъёсысь ужрадъёслы кулэ луись коньдонлэсь 19 процентсэ улос ачиз висъяны кулэ.