Кылдоз Удмуртиез азинтонъя вылез стратегия

Со сярысь вераз Кун Кенешысь Экономикаын политикая, промышленностья но инвестициосъя ялан ужась ӧриен кивалтӥсь Александр Майер журналистъёсын пумиськыкуз.
Депутатлэн кылъёсызъя, Удмуртиез азинтонъя стратегия бордын парламентариос ужалозы Экономикая министерствоен ӵош. Валче эскерозы, мар карыны луэ шаерамы матысь 5 ар ӵоже, кызьы юрттоно предприятиослы тросгес вуз поттыны. Александр Майер верамъя, стратегиын 2035-тӥ арозь но быдэстоно ужпумъёс пусъемын луозы. Со азьланяз ужаны аспӧртэм план луоз. Зэм, куд-ог воштӥськонъёс туэ ик улонэ пыӵазы ни. Кылсярысь, январьысен ужбергатӥсьёс, инвестпроект кылдытӥсьёс, асьсэды промышленность удысын эскерисьёс понна выт тыронъёс капчиятэмын, льготаос юнматэмын. Ужзэс азинтыны мед быгатозы шуыса, выт тыронъя Удмуртиысь законъёсы воштонъёс пыртэмын. Чакламын соос 2020-тӥ арозь. Капчиятэм льготаос но вытъёс патент басьтыны но уногес муртлы луонлык сётозы. Со сяна, инвестпроектъёс но шаерамы уногес кылдозы шуыса осконъёс вань. Кылсярысь, Удмуртиын инвестпроектсэс пыӵатӥсьёс барыш поттэмысьтызы табере 12,5 процент выт тырозы. Азьвыл та лыдпус 1 процентлы бадӟымгес вал. Предприятиослы та шӧдскымон юрттэт. Эсьма, ужбергатӥсьёсты гочатыны луоз, шуэ Александр Майер. Озьыен, каръёсты но гуртъёсты азинтыны луонлык кылдоз. Али ӝог азинскись городлэсь статуссэ басьтэмын Сарапул гинэ. Ёросъёсты но городъёсты выльдонъя луонлыкъёс кылдытон ласянь рос-прос ужаны чакламын. Кылсярысь, мобильной связез но Интернетэз гуртъёсы кысконъя проект пыӵа. Таин валче 9 ёросысь 14 гуртэн телефон но Интернет пыр герӟаськыны луэ ни. Озьы 9 сюрс пала адямиос дорозь шумпотон вуиз. Юн чакласа возёзы промышленной объектъёсты ӝутӥсьёсты, экспертиза ортчытонэз ас кияз кун басьтоз. Солэсь азьвыл со оскемын вал муниципал кылдытэтъёслы.
Озьы ик эскерыса возёзы трос этажъем корка ӝутӥсь предприятиосты. Куд-ог застройщикъёс пуктӥськонзэс йылаз-пумаз уг вутто угось. 2012-тӥ арысен ни, кылсярысь, Ижысь Петров урамысь 49-тӥ юрт интыяз кынмемын, ужъёс гуньдэмын. Александр Майер оскытэ, квартираосазы кузёос пырыны быгатозы 2019-тӥ арын. Сое йылаз-пумаз вуттыны инвестор сюриз ни. Ижысь Широкий пролкаысь сыӵе ик ас вакытаз аналтэм коркае пырыны луоз туэ гужем пумын, нош Дэри ёросысь Хохряки гуртысь «Родниковый край» комплексэ — 2019-тӥ ар пумын. Таослы но ваньзылы выль застройщикъёс сюремын. Инвесторъёсты гочатон вылысь ӵектэмын та интыос котырысь ик музъем. Татчы соос кыӵе ке объект пуктыны, отчы маке усьтыны быгатозы.