Александр Бречаловлэн инаугурациез ортчиз

Туннэ, 18-тӥ куарусёнэ, Кун Кенешлэн куатетӥ ӧтчамезлэн нырысетӥ сессиезлэн нырысетӥ кенешоназ Александр Бречаловлэн Элькун Тӧролэн ужоскетаз пырон ужрад ортчиз. Со радъямын вал Удмуртиысь П.И.Чайковский нимо операя но балетъя кун театрын.
«Кыл сётӥсько, Удмурт Элькун Тӧролэсь ужоскетъёссэ быдэсъякум, адямилэсь но кунмуртлэсь эрикрадъёссэ но эрикъёссэ гажаны но утьыны, Россия Федерацилэсь Кункатсэ, федерал катъёсты, Удмурт Элькун Кункатэз но Удмурт Элькун катъёсты быдэсъяны но утьыны, калык понна оскымон ужаны», - удмурт но ӟуч кылын таӵе анткыл (присяга) сётӥз элькунлэн Тӧроез инаугурация ортчыку.
Сӥё-дано ужрадэ Росси азьмуртлэн Приволжск федерал округъя ужоскето муртэз Михаил Бабич, Кун Кенешлэн куатетӥ ӧтчамаз выль быръем депутатъёс, кивалтэтлэн ёзчиосыз, федерал ёзэсъёслэн Удмуртиысь ёзэтъёссылэн но ужъюртъёссылэн кивалтӥсьёссы, муниципалитетъёслэн тӧрооссы но мукетъёсыз пыриськизы.