Кун Кенешысь депутатъёс тодон-валан нуналлы сӥзем линейкаосы пыриськизы

Туннэ, 1-тӥ куарусёнэ, Удмуртиысь школаос ӧсъёссэс усьтӥзы. Таяз аре элькунысь каръёсын но ёросъёсын парта сьӧры пуксизы 176 сюрслэсь трос дышетскисьёс, соос пӧлын 21 сюрслэсь тросэз – нырысетӥ классэ мынӥсьёс.
Дышетскон ар кутсконлы сӥзем линейкаосы пыриськизы Кун Кенешысь депутатъёс но. Кун Кенешлэн Тӧроез Владимир Невоструев Глаз ёросысь Адам гуртысь школае вулылӥз, Кун Кенешлэн Тӧроезлэн нырысетӥ воштӥсез, тазалыкез утёнъя, демографияя но семья политикая ялан ужась ӧрилэн кивалтӥсез Светлана Кривилева но Кун Кенешлэн депутатэз Владимир Нельзин 73-тӥ но 93-тӥ номеро школаосы ветлӥзы.
Кызьы вераз Светлана Кривилева, котькуд адями та нуналэ аслэсьтыз школаын дышетскем аръёссэ тодаз вае. «Ми тӥ кадь вал ини, нош тӥ ми кадь луоды гинэ ай. Соин ик школаен, тӥляд анай-атайёсыныды сётэм тодон-валанъёсын тыршиды ке, но азьпала ке кыстӥськиды, мон малпасько, тӥляд ваньмыз пӧрмоз», - шуиз депутат. Со дышетскисьёслы сӥзиз выль вормонъёс, нош дышетӥсьёслы но анай-атайёслы – пиналъёсты будэтонын чидан.