Александр Бречалов Кун Кенешысь фракциослэн кивалтӥсьёсынызы пумиськиз
02.05.2017
Удмурт Элькунлэн Тӧроезлэсь ужзэ быдэсъясь Александр Бречалов Кун Кенешысь фракциослэн кивалтӥсьёсынызы пумиськиз. Ужрадэ пыриськизы «Единая Россия» фракцилэн кивалтӥсез Алексей Прасолов, КПРФ-лэн - Владимир Чепкасов, ЛДПР-лэн - Тимур Ягафаров, «Справедливая Россия» фракцилэн - Фарид Юнусов. Со сяна, совещание Кун Кенешлэн Тӧроез Владимир Невоструев, элькун Кивалтэт Тӧроезлэсь ужзэ быдэсъясь Виктор Савельев но улосвыл тӧролэн но кивалтэтлэн администрацизылэсь кивалтӥсезлэсь ужзэ быдэсъясь Сергей Смирнов пыриськизы.
«Али асьмелэн туж бадӟым но кулэлыко политической сезон. Ми вераським трос ужпумъёс сярысь. Шумпоттэ, ваньзы соглаш, дыр вуиз кужымез огазеяны шуыса», - шуиз Александр Бречалов. Фракциослэн кивалтӥсьёссы веразы, ӵошен вераськонлэн кулэлыкез кемалась вуиз ни шуыса. Совещаниын пусйизы, таӵе пумиськонъёс азьланяз но луозы.