Элькун коньдэтэ воштонъёс пыртэмын

Владимир Невоструевлэн кивалтэмез улсын 25-тӥ оштолэзе ортчем Кун Кенешлэн 30-тӥ сессияз эскерем ужпумъёс пӧлын вал бюджет сярысь законэ воштонъёс пыртон. Та рад элькунлэн кисыез 409 миллион манетлы воштӥськиз. Кызьы валэктӥз коньдон ужпумъёсъя министрлэсь ужзэ быдэсъясь Станислав Евдокимов, казнае уксё вуиз транспортлы налог но Россиысь вуэм субсидиос чотын.
— 209 миллион 385 сюрс манетлы йылтом Сюрес фондэз, 102 миллион манетлэсь ятыр кошкоз гуртъёсты азинтон программалы, 97 миллион манет — «Камский берег» кластерлы, — пусйиз Станислав Евдокимов.
Со борды итӥськыса, бюджетъя, вытъя но коньдон ужпумъёсъя ялан ужась комиссилэн кивалтӥсез Софья Широбокова шуиз:
— Коньдон трос ик ӧвӧл кадь, но со туж кулэ удысъёсты азинтыны, азьланьын элькун казнае эшшо тросгес коньдон кыскыны. Кылсярысь, промышленностья фондлы 20 миллион сётом, нош туэ сӥзьыл ик со Россилэн казнаысьтыз 80 миллион манетэн берытскыны быгатоз ни. 50 миллион манет чакламын сирота нылпиослы улон корка пуктонлы, эшшо тросгес — гуртоослэсь улон условиоссэс умоятонлы: егит семьяослы коркаос пуктонлы, сюресъёсты тупатъянлы, газ кысконлы…
Бюджетэ воштонъёсты юнматэм бере солэн доход люкетэз 63 миллиард 954 миллион манетлэсь ятыргес, расход люкетэз 67 миллион 863 миллион манетлэсь тросгес луиз. Дефицитэз ӧз воштӥськы, 3 миллиард 908 миллион манет пала кылиз.