Депутатъёс кыкетӥ лыдӟемен эскерозы элькун бюджетлэсь 2017-тӥ арлы ӵектоссэ
12.12.2016
13-тӥ декабре ужзэ азьланьтоз Удмурт Элькунысь Кун Кенешлэн 28-тӥ сессиез. Ӵуказе солэн кыкетӥ заседаниез ортчоз. Депутатъёсын эскероно ужпумъёс пӧлын кӧня ке законопроектъёс, озьы ик элькун бюджет сярысь кат ӵектос но. Воштонъёс пыртыны чакламын Удмуртилэн таиз арлы коньдэтаз. Со сяна кыкетӥ лыдӟемен эскерозы элькун бюджетлэсь 2017-тӥ арлы ӵектоссэ. Нырысетӥ лыдӟемен депутатъёс сое кылемаз кенешоназы юнматӥзы. Со бӧрсьы 288 поправкаос вуэмын. Бюджетъя, вытъёсъя но коньдон ужпумъёсъя ялан уажсь комиссиын соосты ваньзэ эскеризы: 236-лы дурбасьтӥзы, 52-сэ палэнтыны ӵектӥзы. Ваньзэ тае лыдэ басьтыса элькун бюджетлэн вуоно арлы ӵектосэзлэн табыш люкетэз 2,4 миллиард манетлы будоз, нош уже кутоно люкетэз – 4,35 миллиард манетлы. Ватсаса кык миллиард манет висъяны чакламын лэсьтӥськон удысэз азинтонлы. Оглом коньдэтлэн табыш люкетэз 2017-тӥ арын 59,491 миллиард манет, уже кутоно люкетэз – 63,229 миллиард манет, тырмымтэ люкетэз – 3,738 миллиард манет
(3,6%).