Владимир Невоструев: Удмуртилы юрттонъя 25 дэмлан пӧлысь 20-ез улонэ пыӵа ни

6-тӥ толсуре Россиысь Федерация Кенешын Удмуртилы юрттэт сётонъя ужпумъёсты эскеризы. Сенаторъёс азьын вераськиз Кун Кенешлэн Тӧроез Владимир Невоструев. Со ивортӥз, мар лэсьтэмын ни шаерамы но марлы эшшо саклык висъяно на. Постановление пырем 25 дэмланъёс пӧлысь 20-езъя ужъёс мыно ни. Куд-огезъя дасясько проектъёс, мукетъёсыз улонэ али ик пыӵало ини. Кун Кенешлэн Тӧроез верамъя, улосмылы тужгес кулэ вытъёсъя законопроектэз кутон. Отын шуэмын: субъектлэн 50 процентлэсь тросэз вытъёсыз федерал кисые мыно ке, солы нимысьтыз юрттэт сётоно на. Жаляса верано, та дэмланлы Россиысь Правительство но Лыдъян палата пумит луизы. Но Кун Думаен законопроект палэнтымтэ. Соин ик та удысъя уж азинтӥськоз.
Озьы ик, Федерация Кенешлэн юрттэмезъя Удмуртиысь промышленностез азинтонлы коньдон шедьтэмын. Машина поттон кластерлы 2015-тӥ арын висъямын вал 42 миллион манет. 225 миллион манетлэсь трос вуиз выль производствоез радъяны. «Транспорт радлыкез азинтон» кун программая Ижын тупатэмын луоз аэропорт. 2018-тӥ – 2020-тӥ аръёсы со понна федерал бюджетысь 1 миллиард 475 миллион манет висъяны чакламын.
Элькунын туберкулёзэн висисьёслы больница пуктон сярысь ужпум но берло аръёсы ӵемысь ӝутиське. Сое пуктонлы федерал бюджетысь уксё вуиз ке, Удмуртия дась аслаз но бюджетысьтыз ӧжытсэ 200 миллион манет висъяны.
Федерация Кенешлэсь постановленизэ улонэ пыӵатон азинтӥськоз.