Кун Кенешын депутат кылзонъёсын Удмуртилэн 2017-тӥ арлы коньдэтэзлэн ӵектосэныз тодматӥзы
28.10.2016
Удмуртилэн 2017-тӥ арлы коньдэтэз но 2018-тӥ но 2019-тӥ аръёслы чакланъёс сярысь элькун катлэн ӵектосэзъя «нулевой» кылзонъёс ортчизы депутат кылзонъёсын 25-тӥ коньывуонэ.
Ӵектосъя, элькун коньдэтлэн табыш люкетэз вуоно арын 57 миллиард 830 миллион манет луоз, уже кутоно люкетэз — 58 миллиард 876 миллион манет, тырмисьтэм люкетэз — 1 миллиард 793 миллион манет. Табыш люкетаз 49 миллиард 440 миллион манет вуоз вытъёс но мукет тыриськонъёс чотын, со пӧлысь 42 процентэз (20 миллиард 983 миллион манет) табыш понна вытлэсь, 29 процентэз (14 миллиард 500 миллион манет) — нимаз адямиослэн табышсылэсь выт (НДФЛ).
Федерал коньдэтысь 7 миллиард 643 миллион манет возьмало, лыдпусъёс басьтэмын нырысетӥ чакланъёсысь, соос воштӥськыны быгато.
«Улонъя соос 2 но ӝыны поллы тросгес луо», — пусйиз элькунысь коньдон ужпумъёсъя министр Станислав Евдокимов.
Расходъёсты 28 кун программаосъя чаклазы. Коньдэтысь инвестициослэн 46 процентэз луозы Сюрес фондэ тыронъёс — 4 миллиард 848 миллион манет. Кылсярысь, 72 иськем сюресъёсты лэсьтыны но 52 иськемзэ быдэсак выльдыны чакламын. Лэсьтӥськонлы али 975 миллион гинэ висъязы. Со «коньдэтлэн тужгес бадӟым ужпумез, уксё валче вылысь тыриськонъёсты ворсаны гинэ вань», — вераз Станислав Евдокимов.
Улосвыллэсь кун пунэмъёссэ тырыны вуоно арын 3 миллиард 427 миллион манет кутозы. Нырысь ик со коммерци кредитъёс, кудъёссэ коньдэт пумен ворса.
Приволжск федерал округын бичам вытъёс пӧлысь 6 но ӝыны процентсэ Удмуртия сётэ, со мында луэ округысь мукет 4 улосвылъёслэн ӵошен - Киров улосвыллэн, Чувашилэн, Мордовилэн но Марий Эллэн. Но, 2016-тӥ арын 9 толэзьлы йылпумъянъёсъя, элькунмылэн коньдэтаз 32 процентэз гинэ люкам вытъёс кылизы. Сыӵе лыдпусъёсты шараяз Удмуртиысь Кун Кенешлэн тӧроезлэн воштӥсез — коньдэтъя, вытъёсъя но коньдон ужпумъёсъя ялан ужась ӧрилэн кивалтӥсез Софья Широбокова.
Солэн верамезъя, катӵектос бордын ужаку лэсьтӥськон удыслы тросгес коньдон висъян ужпум борды берытскыны кулэ на (али таиз арлэн 25 процентэз гинэ чакламын). Со сяна, Широбоковалэн кылъёсызъя, чагыр эстӥськон пыртон, школаос пуктон но промышленностез азинтон понна коньдон ӧжытгес чакламын.
Удмуртилэн 2017-тӥ арлы коньдэтэз сярысь элькун катэз нырысетӥ лыдӟемен эскерозы Кун Кенешлэн 29-тӥ шуркынмонэ ортчоно сессияз.