Агропром огъетлы юрттон понна 1,2 миллиард манетлэсь трос уксё чакланы малпало Удмуртилэн 2017-тӥ арлы коньдэтаз

Агропром огъетлы юрттон понна Удмуртилэн 2017-тӥ арлы коньдэтаз 1 миллиард 257 миллион манет чакланы малпало. 20-тӥ коньывуонэ ортчем пресс-конференциын со сярысь ивортӥз элькунысь Кун Кенешлэн агропром огъетъя, музъем кусыпъёсъя, музъем узырлыкез уже кутонъя но инкуазез утёнъя ялан ужась ӧриезлэн тӧроез Владимир Варламов.
«Туннэ нуналлы, 2016-тӥ арлы коньдэтэз быдэстон сярысь верано ке, 1,6 миллиард манетлэсь кӧня ке тросгес луэ. Коньдэтлэн ӵектосэз но кылдэм коньдэт куспын пӧртэмлыкез туннэ вань. Малпасько, Кун Кенешысь ӧри но, мукетъёсыз депутатъёс но со пӧртэмлык бордын ужалозы. Со пӧртэмлыкез ӵапак кулэ луоз 1 миллион тонна йӧл кысконъя программалы коньдон ватсан понна», — пусйиз депутат.
Солэн верамезъя, программаез быдэстон понна коньдон кулэ луоз гидъёс пуктыны но техникаез выльдыны, малы ке шуоно тросэз со вужмемын.